TULOKIBON ug nakakuha og atensiyon sa kadaghanan kining gipakita ni Mayor Marlon Garcia ug konsehal Julie Flores sa lungsod sa Barili human sa piniliay niadtong Mayo 13, 2019.

Ang duha pulos midaog apan managlahi ang ilang partido tungod kay si Garcia ug ang iyang kandidato pagka bise nga si Shiela Pason ubos man sa PDP-Laban samtang si Flores, kinsa nagpapili pagka-bise mayor nagpasilong man sa NPC kuyog ni kanhi mayor Teresito Marinas.

Pipila lang ka oras human masuta ug matino ang resulta, si Garcia ug Flores mapasigarbuhon nga naghangop nga nagselebrar sa ilang kadaugan.

Buot ipasabot nga bisan og managlahi ilang partido andam silang mag-ayuda tungod ug alang sa kaayohan ug pagpalambo sa ilang lungsod.

Dali kini nga nikatap sa social media ug natural lang nga ikalipay kini sa mga Barilihanons.

Pero sukwahi kini sa nahitabo sa dakbayan sa Lapu-Lapu. Sa usa ka video footage nga nikatap sa social media, giwakli ni Mayor Paz Radaza ang kamot ni Pajo Barangay Captain Ahong Chan nga gusto unta nga moabag kaniya sa dihang padulong kini mokanaog sa stage atol sa gipahigayong proklamasyon.

Si Radaza yanong midaog sa pagka kongresista, apan ang iyang bana nga si Arturo “Boy” Radaza ug pag-umangkon nga si konsehal Harry Radaza gipangpildi nila ni Chan ug Celsi Sitoy sa pagka-mayor ug bise mayor sa maong siyudad.

Sabtunon nga anaa pa sa mayor ang kasakit sa wala damhang kapildihan sa iyang bana ug pag-umangkon hinungdan nga nagpabilin pa ang iyang kaligotgot sa nahitabo.

Sakit man tuod, apan hinaot nga dili kini makaapekto sa ilang tagsatagsa ka serbisyo sa mga katawhan. Sama nila ni Garcia ug Flores, hinaot nga ihikling ang panagbangi alang sa kaayohan sa Oponganons. Kini maoy atong lantawon sa unahan.