SULOD sa ikaduha na nga tuig, ang mga taga Dakbayan sa Sugbo magsaulog sa Semana Santa sulod lang sa balay. Gidili sa kagamhanan ang Visita Iglesia ug Way of The Cross nga sagad anha sa gawas sa simbahan gihimo.

Kay ang mga Sugboanon naila man nga relihiyuso, seguradong daghan ang nangahimangod ning desisyon sa Archdiocese sa Sugbo ug Emergency Operations Center (EOC) tungod kay daghan na ang gustong mahibalik na sa normal ang pagsaulog sa relihiyusong mga kalihukan.

Niadtong Pasko makita ang pagdasok sa mga tawo sa pagsimba matag kaadlawon. Giantos ang pagmata og sayo. Apan ning Semana Santa, sa ikaduhang tuig, di na sab makasaulog ang mga taga dakbayan sa Sugbo sa naandang gimbuhaton.

Kining hukom sa EOC ug kadagkuan sa simbahan duna man usay igong basehanan. Sa nanglabay nga mga semana grabe ang pagsaka sa mga kaso sa coronavirus disease (Covid-19) sugod sa tunga-tunga sa Enero hangtod sa sayong bahin sa Marso. Kinsa bay di makulbaan nga diha man gani adlaw nga niabot og 300 ang nagpositibo sa Covid-19?

Maayo gani kay di pareho sa miaging tuig, nasayod na ang kagamhanan unsay buhaton. Andam na ang isolation centers ug mga katre sa publiko ug pribadong mga tambalanan. Paspas nga gidugangan ang mga contact tracer aron ma-isolate ug matambalan ang mga nagdala sa kagaw.

Ning nanglabay nga mga adlaw, hinayhinay nga nagkagamay ang mga kaso sa Covid-19. Hinaut pang magpadayon kining mao nga dagan aron makaginhawa nag lawom.

Tan-awa ra gud ang nahitabo sa National Capital Region (NCR) ug silingang mga lalawigan, nisulbong ang mga kaso sa Covid nga mas taas pa kaayo itandi sa miaging tuig. Di ordinaryo ang pagsulbong sa mga kaso hinungdan nga nahibalik sila enhanced community quarantine. Busa, angay sabton ang kagamhanan sa Siyudad kon higpit sa mga relihiyusong tapok ning Semana Santa kay kuyaw pa.