Ikaduhang tuig karon nga gisaulog sa Cebu Press Freedom Week taliwala sa pandemiya sa Covid-19. Kagahapon sa udto, Septiyembre 19, gipahigayon ang misa sa pag-abli sa usa ka semana nga kasaulogan sa San Pedro Calungsod Shrine sa Archbishop Residence sa dakbayan sa Sugbo.

Sama sa miaging tuig, virtual o pinaagi sa Facebook live ang misa nga gipangulohan ni Fr. Jonathan Rubin, content manager sa social media sites sa archdiocese, pipila lang ang nanambong nga hugot nagpatuman sa health protocol.

Sukwahi sa nangaging katuigan, alegre ang pag-abli ug tibuok semana sa kasaulogan tungod sa kadaghan sa kalihokan. Bugtong panahon nga magkatapok ang mga sakop sa media ug gihiklin ang kompetisyon aron pagsaulog sa gawasnon nga pamahayag ug pagpanalipod sa matinud-anong pagtaho.

Subay sa Wali ni Fr. Rubin, ang pandemiya nakahimo og dakong kausaban sa tanang aspeto sa kinabuhi ngadto sa bag-ong normal nga nagpaspas sa pagdawat sa digital nga pamaagi. Buot ipasabot nga nahimong laktod ang tanan pinaagi sa pagduwa sa mouse, pagpindot ug pag-tap sa screen.

Nitumaw ang social media nga unang nakaapekto sa tradisyonal nga prensa. Masinati sa tanan ang sayong pagkuha ug pagpasa sa kasayoran sa bag-ong plata-porma sa komunikasyon. Matod ni Fr. Rubin, nitumaw ang gitawag nga ‘posumers’ o ang netizens mahimong content producer ug sa samang higayon konsumidor niini.

Apan dinhi usab nagsunod ang fake news, dunay pagtuis sa taho o paghimo og balak nga taho. Pun-an sa pandemiya nga nagpaspas sa digitalisasyon, nahimong komplikado ang tanan sa paghatod sa gawasnon ug matinud-anon nga kasayoran.

Dakong hagit kini sa bugtong nga kasaulogan sa media sa nasod, ang Cebu Press Freedom Week. Bisan sa kadaghan sa hagit sa kabag-ohan ug pandemiya, padayon kining nanalipod ug mibarog sa pagsaulog sa kamatuoran.