WA aprobahi sa Department of Health (DOH) 7 ang aplikasyon sa Siyudad alang sa pagbutang og sementeryo sa Barangay Sapangdaku, bukirang dapit sa Dakbayan sa Sugbo. Ang sementeryo alang sa mangamatay sa coronavirus disease (Covid-19) sa siyudad.

Matod sa DOH 7 nga di maayo ang dapit butangan og sementeryo kay duol sa sapa ug kuyaw sa landslide. Samtang si Mayor Edgardo Labella niingon nga duna pay ubang mga dapit nga mahimong mabutangan sa Siyudad og sementeryo.

Dihang taas pa kaayo ang mga kaso sa Covid-19 sa siyudad niadtong Hunyo, naglisod na sa pagpanawat ang mga sementeryo kay kuno, puno na. Di tingali puno. Di lang maato sa mga nagdumala sa sementeryo ang pag-apas sa gipanglubong tungod sa kataas sa gidaghanon. Karon nga nagkagamay ang mga kaso ug sa nangamatay, maayo tingaling di dali-dalion ni Mayor Edgardo Labella ang pagtukod og sementeryo. Tun-an una og maayo ang alternatibong mga dapit nga kabutangan niini. Seguraduhon nga di kini hulga sa labing duol nga komunidad. Himuon usab kining lubnganan di lang sa Covid-19 nga mga pasyente, kon di sa uban pa. Hatagan og prayoridad ang mga kabus.

Kinahanglan usab nga di lisod ang agianan sa dapit, dunay maayong karsada ug sayon rang adtuon. Ang lugar sa Sapangdaku way pampublikong sakyanan nga magbiyahian.

Duna nay igong panahon ang City Hall alang sa pagtukod sa pampublikong sementeryo nga mahimong i-pattern sa mga memorial park, apan mga kabus sa dakbayan ang makapahimus.Kinahanglan nga ang sementeryong tukoron di lang usa ka reaksyon sa hitabo, sama sa Covid pandemic. Ang resulta magtukod og gilamo-lamo nga sementeryo nga pang temporaryo.

Puslan man nga kini nasugdan, tiwason kini nga han-ay, giplanog maayo, nindot ang ang pagkahimutang ug sayon rang adtuon ang nahimutangan. Sementeryo nga ikapasigarbo usab sa Kagamhanan sa Dakbayan sa Sugbo.