MIBUKAL na pag-ayo ang kawa sa pulitika. Pipila ka adlaw gikan karon o sunod buwan mao na ang pagsumiter sa certificate of candidacy (COC) ngadto sa Commission on Election (Comelec). Usa sa timailhan sa kainit sa pulitika mao ang pagtumaw sa mga balimbing ug mga alibangbang nga politiko.

Dugang pa, ang taho sa pagkasiak sa mga alyansa ug partido. Ang kanhi kauban, gipaabot nga magkakontra sa bugnong-lugaynon sa Mayo 2022. Ang pagkabahin sa kabanay o pamilya dili mapugngan tungod sa ilang managlahing politiko o partido nga gisuportahan.

Dunay nagkauli usab nga relasyon human nagkahiusa sa ilang gilabanan nga politiko o pundok sa pulitika. Nanggawas na usab ang mga ngalan nga motumaw sa nagsingabot nga piniliay tungod negosyo nila ang pagpagamit sa politiko o partido sa pagsaka og kaso batok sa ilang kaatbang, labina ang anaa sa posisyon nga buot magsubli sa pagpapili.

Mao kining personahe nga nagpa-busy sa Ombudsman ning panahona tungod sa tuo-ug-wala nga reklamong gipasaka tumong sa pagpiang sa gahom sa naa sa pwesto.

Kinsa sila? Ang nagpasaka og mga reklamo nga gitayming sa nag-angat ang eleksiyon, kadudahan nga sila mao na ang atong gipasabot. Kon lilion ang ilang lihok, masubay nga sekreto kining nakigtagbo sa mga inilang politiko o lider sa partido nga naggawong kanila bugti sa dakong salapi.

Samtang, ang mga image builder, press relations firms ug mga tigpaniid alang sa usa ka politiko segurado nga naglihok ug mikamang sa pagmaniubra sa hilom.

Karong Oktubre, mohinog na ang mga balimbing. Mga alibangbang nakatugpa na. Apan kitang yanong lungsoranon dili mapadala sa ilang diskarte. Mobarog sa atong balaang katungod sa pagpili. Magpakabana sa mosunod nga motimon sa renda sa kagamhanan.