DAGHAN nang naghikog sa duha ka mga taytayan sa Mactan. Maorag paborito kining dangpanan sa mga tawo nga gusto nang mamatay.

Mga opisyal sa kagamhanan igo rang nagtuki og mga lakang, apan ang natuman mao lang ang pagbutang og closed circuit television (CCTV) camera.

Dunay mga lakang nga pabantayan ang duha ka mga taytayan, apan sa nangaging katuigan susama ra og nagtuhiktuhik ang mga pulis sa pagbantay.

Niadto lang Dominggo sa gabii nasugdan ang pagbantay nga seryuso sa duha ka bridges human momando si Police Regional Office Director Brig. General Debold Sinas nga bantayan ang tulo ka mga taytayan, nga naglakip sa Cansaga bridge. Kini human moambak ang usa ka 16 anyos nga atleta.

Tuod man, epektibo kaayo ang pagbutang og mga pulis kay makaduha na ka mga higayon nga sila nakapugong og mga tawo nga buot maghikog. Kini bisan kon ang pagbantay gikan lang sa alas 9 sa gabii hangtod sa alas 6 sa buntag. Unsa na kaha kon 24 oras ang pagbantay?

Masusternir ba sab kaha sa mga pulis ang pagbantay sa duha ka mga taytayan? Mapadayon ba sab kaha kon wa na si Sinas sa Camp Sergio Osmeña?

Mahinungdanon ang pagbantay sud sa 24 oras sa duha ka mga taytayan. Ang pagbantay gimbuhaton sa kagamhanan kay kini publikong mga imprastraktura. Di usab rocket science o lisod kaayo ang pagpangitag makabantay niini.

Sabutan ug pangitaan untag paagi sa bridge management board, local government units, national agencies ug ubang stakeholders ang pagbantay. Duha ang maigo kon kini buhaton.

Una, mapanalipdan ang taytayan ni bisan kinsa nga dunay dautang plano niini. Ikaduha, mapanalipdan usab ang kinabuhi sa mga tawo nga gustong magpakamatay.

Ingon ana ba diay ka lisod ang pagpabantay sa taytayan?