Giakusahan ang pipila ka mga opisyal sa Dakbayan sa Sugbo sa usa ka quarry operator nga nanawat og suborno gikan kaniya. Si Benito Aratea nipasangil kanila ni Cebu City Administrator Floro Casas, MCWD Board chairman Jose “Joey” Daluz, kanhi city legal officer Rey Gealon, Jaypee Labella, anak ni Mayor Edgardo Labella ug City Environment and Natural Resources (Cenro) nga nakadawat og mga suburno.

Apan sila si Daluz, Casas ug Gealon nanghimakak sa mga pasangil batok kanila. Sayon ra sab ang pag-deny sa mga pasangil labina kon way ebidensya ang kontra. Dali ra usab ning tuohan o di. Apan ang pasangil namansahan man gud sa pulitika tungod kay ang nagdapit kang Aratea mao si City Councilor Nestor Archival, kaalyado sa Bando Osmeña Pundok Kauswagan (BOPK).

Kon ibutang nga tinuod ang gisulti ni Aratea, guilty usab siya sama sa iyang giakusahan nga mga opisyal. Nadugangan pa ang sala tungod kay inay karsada ang iyang gibuhat, matod ni Daluz, sama na man hinuon siya sa nag-quarry sa dapit. Mao kuno ni ang hinungdan kon nganong gipahunong sa Cenro ang operasyon ni Aratea sa dapit.

Makabarog ba kaha ang pasangil ni Aratea batok sa iyang gipang-akusahan nga pulos mga kaalyado sa Barug-PDP Laban? Naa ba kaha siyay ikapakitang mga ebidensya nga makabarog sa paghashas unya sa Ombudsman kon kini imbestigahon? O kutob lang sa laway ang tanan? Kini ra ba wa lang makaguba sa kredibilidad sa mga gjpangpasanginlan, kon di sa administrasyong Labella ug ni Acting Mayor Michael Rama.

Sa balaud sab sa pagpanerbisyo publiko, ang nanuborno ug nanawat sa mga suburno dunay mga tulubagon.

Hinaut pang di lang laway kutob kining kang Aratea, hinaut nga makabarog kini sa korte kon moabot man. Sa pagkakaron, nakamansakkini bisan kon ang estorya barato ra.