NIADTONG Sabado, nautingkay ug gibati na og kabalaka ang mga molupyo sa lungsod sa Balamban ug ingon man ang kasikbit nga dapit human nga ang usa ka pasyente nga nadala sa Balamban Provincial Hospital ang namatay ug napamatud-an nga positibo sa coronavirus disease (Covid-19).

Ang maong pasyente, 69 anyos, dili lumad nga taga Balamban kon dili gikan sa lungsod sa PInamungajan apan tungod sa emerhensiya nga panginahanglan didto kini dad-a sa maong hospital.

Kini nahitabo niadtong Martes sa alas 10 ang takna sa buntag ug paglabay sa usa ka oras nabugtoan sa iyang kinabuhi. Gipaubos gilayon kini sa swab test ug, basi sa resulta nga migawas niadtong Sabado, nagpositibo sa Covid-19 ang namatay.

Tungod niini, pinangulohan ni Dr. Nap Macapaz, Balamban Municipal Health Officer, gipahigayon gilayon ang contact tracing ug gi-quarantine na usab ang mga immediate families sa mga nurse ug doctor nga na expose sa maong pasyente.

Atong gihangop ang dinaliang aksiyon nga gihimo sa mga health officers sa maong lungsod, timaan nga wala sila magpasagad sa ilang obligasyon.

Pero ang usa sa gikabalak-an karon mao kining mga nadawat nga diskriminasyon ug ingon man pag-bully ngadto sa ilang mga front liners kinsa linawas nga misugal sa ilang kinabuhi sa pagpakigkumbati batok sa Covid-19 aron lang malayo sa risgo ang katawhan.

Sa reklamo nga atong nadawat, ang diskriminasyon gipaagi sa online nga daw og naghagit ug sa samang higayon, naghulga.

Niini, atong awhagon ang konseho sa lungsod sa Balamban sa pagpalabang og anti-discrimination ordinance nga nagprotehir sa mga frontliners.

Ang probinsiya sa Sugbo aduna nay ordinance kabahin niini apan sigon sa napublikar, wa kini maglakip og discrimination nga i-post sa online.