HUMAN sa dugay nang paghuwat, gipahibawo sa Department of Transportation (DoTr) nga karong tunga-tunga sa Marso, magsugod na og panagan ang pipila ka mga bus agi sa rota nga gitagana sa Bus Rapid Transit (BRT) system.

Kon sabton ang gisulti ni Transportation Secretary Arthur Tugade, pipila pa lang ka mga bus ang padaganon sa rota ug hangtod lang sa Fuente Osmeña.

Dugay nang nagpaabot ang mga Sugboanon sa pagpatuman unta sa BRT, apan kasagmuyo ug kahimangod ang gibati. Maorag di sab ni makasulbad sa kahuot sa trapiko karong panahuna ang pagpadagan sa mao nga mga bus.

Nganong di ni makasulbad? Ang lanes ug karsada nga agian niini wa pa maandam. Naa bay napalapdan nga dan sa rota? Wa pa may bisan usa. Bisan gani kadtong dedicated nga bus stop ug iya lang nga lane, wa pa may makita.

Ang mahitabo unya niini mao nga ang mga bus nga managan mahitipon ra sa ordinarong mga sakyanan nga naa sa dan. Ang volume sa mga bus madugang sa gidaghanon sa mga sakyanan nga nagdagan.

Ang katuyoan unta ning BRT mao ang pagpaminos sa mga sakyanan nga managan sa karsada. Ipakita sa publiko nga mas sayon ug paspas ang pagbiyahe kon mag BRT kay sa magdala og sakyanan. Busa madasig ang publiko nga di magdalag sakyanan.

Apan ning dagana karon, kon way dan nga gipalapdan alang ning mao nga mga bus, madugang sila sa mga sakyanan nga naghuot nang daan. Inay nga paspas ang iyang pagbiyahe sumala sa gipaneguro sa iyang proponents, di kini mahitabo. Makab-ot lang kini kon subayon ang tanang nakalatid kon unsa ang BRT.

Usa lang hinuon ang mapaabot sa mga sumasakay sa mga dapit nga iyang agian, kanang kabugnaw ug kakomportable sa pagsakay kay aircon buses ang managan. Nganong di man lang huwaton sa DOTr ang pagkahuman sa estraktura sa BRT, inay nga magbutang og bus nga magdugang sa kahuot sa dan?