Ang Philippine Drug Enforcement Agency (PDEA) 7 miangkon sa pagbalik og sulbong sa pagpayuhot sa gidiling druga sa Sugbo human tangtanga ang hugot nga restrictions sa pademiya.

Si PDEA 7 Assistant Director John Mark Malibiran, atol sa Openline Forum sa Waterfront Cebu City Hotel and Casino kagahapon, Agusto 2, 2022, nagkanayon nga atol sa pagsulbong sa kaso sa coronavirus disease 2019 (Covid-19) sa nasod niadtong 2020, taas ang volume sa import nga illegal nga drugas.

Apan, matod ni Malibiran, kusog ang importasyon sa sayong bahin sa pandemiya apan hinay ang pagpang-apud-apod niini lukop sa nasod. Nagtuo siya nga gitigom kini sa mga dagkong tigpayuhot og illegal nga drugas ug nangita og tayming.

Ug karon ang tukmang panahon? Kon nasayod ang PDEA sa pagtaas sa importasyon niadto, nganong wala masanta? o bana-bana lang ba kaha kini ni Malibiran?

Sa kasamtangan, namatikdan sa opisyal sa PDEA 7 nga nagkahuyang ang monitoring sa awtoridad sa mga nag-unang pantalan sa nasod nunot sa pagluag sa restrictions sa pandemiya ubos sa Alert Level 1. Masabtan lang kini. Kon nakalusot ang importasyon sa drugas panahon sa pagsulbong sa Covid-19 nga hugot ang restrictions, unsa na kaha karon nga luag na?

Apan ang problema sa gidiling druga dili masulbad sa pagpanakop lamang, gikinahanglan ang edukasyon. Kon kusog gihapon ang negosyo sa druga, timailhan nga pakyas ang aspeto sa pag-edukar labina sa mga batan-on.

Mawala sa iyang natural nga kamatayon ang problema sa druga kon wala nay parokyano nga moabuso niini, molurang usab ang mga ngilngig nga krimen nga binuhatan sa mga suspek nga gitukmod sa gahom sa druga.

Ang pagsulbong og balik sa drugas subay sa pagbutyag sa PDEA 7 naghatag og kabalaka. Dili lang kini sa responsibilidad sa awtoridad, apan kaakuhan sa tanang lungsoranon nga mahigugmaon sa kalinaw ug luwas nga katilingban.