SA NGALAN sa propisyonalismo sa pagmaneho og sakyanan, good luck sa gusto nga mokuha og lisensiya sa pagkadrayber. Sugod karong Abril 2020, magkinahanglan na ang Land Transportation Office (LTO) og 15 ka oras nga theoretical driving course sa matag indibiduwal nga mokuha og student’s permit.

Pagkahinanali sa mando. Maayo man hinuon ang tumong, apan kon kini walay kaubang socialized program, sama sa nagduot sa mga kabus nga way daling masudlan sa trabahaho gawas sa pagka drayber. Walay bikil sa mga adunahan.

Ang 15-oras nga theoretical driving course dugang buslot sa bulsa sa mga kabus. Bisan ang Technical Education and Skills Development Authority (Tesda) sa kagamhanan dunay bayad sa pagkat-on sa pagmaneho og sakyanan.

Kini nga kamandoan nagsumikad sa Memorandum Circular No. 2019-2176 sa ahensiya nga pabor kaayo sa driving schools tungod sa pagratsa sa implimentasyon, klarong wa maghunahuna o walay konsiderasyon sa baga nga kliyente sa ahensiya.

Ug sama sa ubang taas nga opisyal sa LTO sa kaulohan, si LTO 7 Regional Director Victor Caindec nga sa Abril na kini nila ipatuman, apan kinahanglan nga magpa-accredit ang tunghaan nga gustong mo-offer niini sa publiko.

Kon walay tanyag ang LTO o kagamhanan sa socialzed driving, klaro nang dunay pakigkunsabo sa mga nagnegosyo o driving schools. Dugang ni Caindec nga si Presidente Rodrigo Duterte mismo gusto nga ‘intelligent drivers’ kining anaa sa kadalanan aron usab malikayan kining mga aksidente. Sakto ang presidente apan ang paghunahuna sa makiangayon nga balaud gisangon diha sa ahensiya.

Dili hambog apan ang Pilipino nga drayber inila ug pinagita sa gawas sa nasod bisan wala moagi sa driving schools. Lisod tupngan ang iyang kahanas ug kataas sa pasensiya sa pagmaneho. Sweet lover pa.