UNSA kahay bertud ni Cebu City Mayor Tomas Osmeña nga wala sukad madukli sa ngipon sa Ombudsman Visayas bisan sa daghang reklamo nga gipasaka batok kaniya? Seguro, maayo lang kaha pagkatubag sa mayor ang mga kaso hinungdan nga naabsuwelto.

Apan dakong hagit sa Ombudsman ang ulahing pamahayag ni Osmeña human kompiyansa gihapon sa ipasaka nga kaso sa Ombudsman batok kaniya human makita sa tulo ka higayon nga nanugal sa usa ka pasugalan nga walay lisensiya.

“I will answer all. That’s normal. They always come up with things. I’m going to die, I’m like this, I’m like that. I’ve never been convicted by the Ombudsman. Never,” pahayag sa mayor nga gikutlo ning mantlaan.

Si Conrado Romano, ang nikiha sa mayor, adunay tulo ka mga litrato diin makita si Osmeña nga naglingkod sa poker table uban ang pipila ka players. Iyang gikiha si Osmeña nunot sa kalapasan sa balaod mahitungod sa kahiwian sa lihok sa usa ka public official.

Ang Department of Interior and Local Government (DILG) Memorandum Circular 2017-20 nagklaro nga gidili sa mga opisyal ug empleyado sa gobiyerno ang pagsulod ug pagsugal sa gambling casinos.

Matod ni Romano nga niadtong Enero 2019 sulod sa House of Jacks nga naa sulod sa usa ka wine shop sa Barangay Kamputhaw, siyudad sa Sugbo iyang nakita makatulo ka higayon ang mayor nga nanugal.

Ug ang maong pasugalan gironda sa mga sakop sa City Mobile Force Company niadtong Enero 30, 2019 tungod sa reklamo sa Philippine Amusement and Gaming Corp. (Pagcor) nga nag-operate nga walay lisensya ug 19 ka tawo ang nangasikop.

Hinuon, panahon karon nga nagkainit ang pulitika nunot sa duol na kaayong eleksiyon sa Mayo 13, diin ang mga alegasyon kadudahang may bulok sa pulitika apan, maayong masusi kini pag-ayo ug dakong hagit alang sa imahen sa Ombudsman.