MAKASUBO hunahunaon nga pipila ang dili gihapon motuo sa coronavirus disease 2019 (Covid-19) taliwala sa daghang nasakit ug namatay. Hinuon, gawasnon kita sa atong pagtuo apan dili usab angay pasagdan kon ang maong pagtuo makaapekto sa kinatibuk-an, labi na bahin sa panglawas.

Naningkamot ang kagamhanan nga makab-ot sa labing dali nga panahon ang herd immunity aron pagsanta nga makamugna ang atong dapit og variant sa Covid-19. Buot ipasabot, kinahanglan nga mabakunahan ang mayoriya sa populasyon sa nasod aron masanta ang pandemiya. Apan unsaon nato sa pagkuha sa herd immune nga komunidad kon dunay magmaluki sa pagpabakuna?

Ug dugang hulga ang taho nga nakasulod na sa nasod ang variant nga namugna sa India nga mas isog, ang Delta variant (B.1.617.2). Sumala sa Department of Health-Central Visayas (DOH-CV niadtong Sabado sa hapon, Hulyo 31, 32 na ka mga kaso sa Delta variant ang nakaplagan sa rehiyon. Dugang sa DOH, kini tanan naa sa Sugbo.

Ang bag-ong upat ka kaso nakuha sa swab test gikan sa Hulyo 4 ngadto sa 10 ug kauban sa samples nga gipadala sa Philippines Philippine Genome Center (UP-PGC) alang sa genome sequencing aron pagkompirmar sa kadudahang kaso sa pasyente nga dunay kalahian nga karakter sa naandang Covid-19.

Sa kinatibuk-an, gawas sa upat sa CV, 83 sa National Capital Region, tulo sa Calabarzon,duha sa Davao Region, ug usa matag usa sa Zamboanga Peninsula, Cagayan Valley ug Ilocos Region. Base kini sa nipaubos sa swab test. Pila kaha ang nagtago o wala motaho tungod sa kahadlok sa kamatuoran?

Ang hulga sa Delta variant miabot na, apan wa kini magpasabot nga mohunong kita sa kalihokan sa pagpanginabuhi. Triple lang ang pagmatngon. Mosunod sa minimum health protocol. Usahon ang pagtuo batok sa pendemiya. Labaw sa tanan, mag-ampo ug magpabakuna.