SA IKATULO nga adlaw sa general community quarantine, ang pampublikong mga sakyanan sama kanihit sa tubig sa disyerto. Daghan ang nag-atang, apan bisan anino way makita.

Sa wa pa gilibkas ang GCQ, duna nay gipahibawo nga mga rota sa mga bus ug beep sa Dakbayan sa Sugbo. Nindot paminawon ang pahibawo sa Land Transportation Franchising and Regulatory Board (LTFRB) nga duna nay masakyan ang publiko sa pagkanaug na ngadto sa GCQ sa Dakbayan sa Sugbo.

Apan bisan ang mga taxi wa pa makapamasada og balik kay daghan pa ang pagahimuong kausaban sa matag unit aron malikayan ang kahigayunan nga dunay magtakdanay sa sud. Giingong usa ni sa mga hinungdan nganong nalangay ang pagbalik sa dan sa mga taxi.

Kini lain na sab nga pagpakita sa kakuwang sa plano sa mga opisyal sa kagamhanan ug kakuwang nila og pakabana sa kinabuhi sa mga kabus.

Tan-awa lang, unang giigo mao ang mga motorsiklo nga maoy naandan ug dangpanan sa mga kabus nga pamilya. Gidili na ang pag-angkas kay kuno kuyaw sa takod sa coronavirus disease (Covid-19). Bisan sa mga hangyo sa mga mayor nga tugtan lang ang magpamilyang mag-angkasay, wa gihapon kini gitugot bisan kon kwentadahon, mas luwas ni kon itandi sa public transportation.

Kadaghan sa mga kabus nga nag-agwanta na lang sa paglakaw sa dan samtang naglagiting ang kainit, samtang ang mga adunahan, apil na ang mga public official, naa sa ilang airconditioned nga mga sakyanan.

Mao ni ang mga opisyal nga nagsige og hangyo sa ilang botos. Mao ni ang mga opisyal nga nanudlo og mga tawo nga mangdumala sa mga buhatan sa kagamhanan.

Di man tingali ni sila kuwang sa plano. Hayan kuwang lang sila sa gugma sa pagserbisyo sa mga kabus, kinsang mga pag-antos di nila ma-relate. Kapait sa pobre.