BISAN ang mga tinun-an pa lang sa enenyero atong gipanguta nga unsay sakto nga pamaagi sa pagpatuman sa proyekto sa kadalanan, ang dan unahon o ang kanal. Ang ilang tubag tanan mao ang naulahi. Mahimong walay pulos ang dan o madaut lang gihapon kini bisan unsa kapulido sa pagkahimo kon walay sakto nga kanal o drainage system.

Ang resulta, dalan nga mahimong sama sa sapa o suba panahon sa pagbunok sa uwan.

Mismo si Roy dela Cruz, project engineer sa Mambaling underpass, nipasabot nga usa nag-unang hinungdan sa mas nigrabe nga baha sa dapit human sa underpass project tungod sa wala mapatuman nga P15 milyunes nga road widening ug kanal.

Laing P18 milyunes nga drainage system nga tupad sa underpass dapit sa Shopwise nga moganoy unta sa tubig sa baha ngadto sa dalan Tagonol sa Barangay Basak Pardo napakyas usab tungod sa problema ug isyu.

Matod ni Engr. dela Cruz, mas maayo unta nga nag-una sa pagkahuman ang tukma nga drainage system.

Ang komentaryo sa batid na sa pagtukod sa inprastraktura haom sa mga komentaryo sa mga tinun-an sa enenyeryo, kinsa lab-as sa ilang hunahuna ang leksiyon sa ilang propesor bahin sa insaktong proseso sa pagpatuman sa proyekto.

Dili sab kita makaignon nga bogo ang mga enenyero sa Deparment of Public Works and Highways (DPWH) 7. Nakapasar gud sila sa board examination sa pagka eneyero. Paet. Ang korapsiyon kaha ang hinungdan? Hinaut nga dili unta.

Good luck na lang, daghang kadalanan nga maayo pang aspalto libot sa dakbayan apan gipanglukat ug gisemento. Maayo. Pero tan-awa, wa unaha ang drainage o kanal. Worse pa, ang uban way kanal, gisemento tanan. Kon magkanal na, bakakon na pud ang semento?