ISIP yanong molupyo, matingala kita nganong nagbalikbalik og tumaw ang mga ngalan sa pipila ka inilang tawo kon maghisgot kita og pagkuyanap sa negosyo sa gidiling drugas, sama nila ni Peter Lim, Daanbantayan Mayor Vicente Loot ug uban pa, apan sa makadaghang higayon usab sila nanghimak sa awrtoridad. Kon motuo ka ba sa panultion nga “Kon dunay aso, duna gyuy kayo?”

Bisan tuod dayag na apan igmat pa sa langgam nga manatad sa paglihay gamit ang ilang kuwarta o impluwensya. Busa lisod ang pagsikop sa druglord o bigtime protegtor. Masabtan lang kon nganong ang mga mayukmok lang kanunay ang mapaakan sa ngipon sa balaud.

Sa ulahing pagbisita sa Sugbo ni Presidente Rodrigo Duterte, subli niya nga gihinganlan si Loot sa mga lokal nga opisyal nga nalambigit sa gidiling drugas. Usa ka retirado nga opisyal sa kapulisan si Loot ug daan nang dunay gihungihung nga niduwa kini sa sindikato sa drugas apan walay usa nga nangahas sa pagduhig sa iyang ngan sa publiko gawas sa paglingkod sa kasamtangang presidente sa nasod.

Kon ang ordinaryong tawo dili maayong malambigit sa pagpayuhot sa gidiling drugas, usan na ka kaha ang mga opisyal sa awtoridad o kagamhanan?

Apan pwerteng panghimakak ni Loot sa tanang akusasyon ug ning ulahi, nitanyag sa kapulisan sa lalawigan ug rehiyon sa pagsiksik sa iyang tanang balay uban sa paghagit sa pagpangita bisan sa lama sa gidiling drugas.

Si Robert Quenery, direkto sa Police Regional Office (PRO) 7, nibalibad sa tanyag ni Loot apan niingon nga mosusi sa balay sa mayor kon dunay igong ebidensiya nga mahipos.

Ginaingon usab nga “Walay aso nga makumkom” apan wala kita maghukom ni Loot ug uban pang opisyal. Hinuon, dakpan o ikiha na sila aron makatubag sa tukma nga hawanan. Dili patyon ang ilang imahen sa korte sa opinyon.