HALANDUMON ang ulahing duha-ka-adlaw nga pagbisita ni Presidente Rodrigo Duterte sa Sugbo. Ang Bisaya nga presidente namista sa iyang kabanay sa lungsod sa Tabogon kagahapon sa human sa iyang pakigtigom sa mga lokal nga opisyal sa Sugbo nianang buntag diin subli niya nga gipahibalo ang hugot nga kampanya batok sa gidiling drugas ug korapsiyon sa kagamhanan. Siya maoy niabli sa National Games sa Cebu City Sports Complex niadtong Sabado sa buntag.

Apan ang labing halandumon ug makasaysayanon nga gihimo ni Duterte mao ang pagsubo o pormal nga pag-abli sa produksiyon sa Alegria Oil Field Polyard sa Barangay Montpeller, lungsod sa Alegria niadtong Sabado sa hapon nga gilauman mosulbad sa problema sa kanunay nga pagmahal sa presyo sa lana sa nasod, mahukmanong modala sa pagsaka usab sa mga nag-unang palaliton sa merkado.

Kon dako ang produksiyon, segurado nga nag-unang makabenepisyo sa lana sa kinabuhi mao ang Alegria uban sa lalawigan sa Sugbo ug tibuok nasod. Manghinaut kita direktang makatabang kini sa nasod. Dili mahisama sa The Malampaya Deepwater Gas-to-Power project sa Palawan sa Shell Philippines Exploration nga wala na igdungog ug walay natabang sa krisis sa lana sa nasod.

Ang bag-ong operasyon sa Alegria ug laing unom ka eksplorasyon gihimo sa China International Mining Petroleum, Co. LTD (CIMP) ang gi-monitor karon sa Department of Energy (DOE), sumala ni Energy Usec. Felix Puentebella. Si Energy Sec. Alfonso Cusi niingon nga ang daghang kalihokan sa pagpangita og lana sa nagkalainlaing dapit makaayo sa ekonomiya ug makahatag og daghang trabaho.

Manghinaut kita nga dili sakyan sa karaang pamulitika ang kalamboan sa Alegria. Maghiusa ang tanan alang sa iyang kalamposan. Mapasalamaton kita sa Ginoo nga gihatagan kita og grasya nga lana sa kinabuhi.