MALAUMON ang pakigbatok sa krisis sa coronavirus disease 2019 (Covid-19) sa dakbayan sa Sugbo base sa taho gikan sa New Normal Oasis for Adaptation and a Home (Noah), labing dako nga isolation facility nga gitukod ug gidumala sa kagamhanan sa dakbayan .

Si kanhi konsehal Joy Pesquera, manager sa Noah, nagkanayon nga pito na ka hugna nga sila nitugot sa paggawas og mga pasyente human nagnegatibo sa Covid-19 sukad sa pag-abli sa naasoy nga pasilidad niadtong Mayo 28, 2020. Nikabat na tanan og 268.

Matod ni Pesquera, ang ikalimang hugna maoy labing daghan nga nikabat og 97 nga gitugtan nga makagawas na niadtong Lunes, Hulyo 20. Base sa talaan sa samang adlaw, ang pasilidad dunay 154 ka mga pasyente nga nag-alim pa sa sakit nga dili grabeng kaso, positibo apan walay sintomas.

Apan, ang Noah nagpadayon sa ilang pagpangdawat og mga asymptomatic nga pasyente sa Covid-19. Gipahibalo usa sa tagdumala sa pasilidad nga niadtong Hulyo 22, 2020 ang labing daghang nasulod sa nga niabot og 87, ang 70 niini mga sakop sa Philippine National Police (PNP).

Tungod niini, si Mayor Edgardo Labella nalipay sa maayong kalamboan ug nagpasalamat sa tanang personnel sa Noah nga nahimutang sa South Road Properties (SRP). Ang Noah dunay 4 ka mga doktor, 12 ka nurses ug ubang health workers nga naghimo sa ilang mabayanihon nga tahas sa pag-atiman sa mga pasyente. Congratulations kaninyo.

Samtang, duna pay laing mga pasilidad sa dakbayan apan ang Noah maoy labing dako, busa ang datus gikan niini importante sa pagtuki sa kahimtang. Maayo unta nga ilibkas sa Inter Agency Task Force (IATF) ang modified enhanced community quarantine (MECQ) sa dakbayan kon magpadayon kini.

Ang Covid-19 taudtaod pang mawala, sumala sa batid sa panglawas. Tungod niini, kinahanglang mopadayon na kita sa pagpakabuhi ubos sa bag-ong normal.