DILI kita magsalig sa Philippine Atmospheric Geophysical and Astronomical Services Administration (Pagasa) sa pagbanabana sa dagan sa panahon ug pagpamati sa ilang mga pahimangno.

Mismo kita mahimong maniid sa sitwasyon sa palibot ug mohimo og inisyatiba sa paglikay o kaminosan ang epekto sa kinabuhi ug kabtangan labi na ang namuyo sa risgong dapit sa baha tungod sa pagbunok sa uwan.

Dunay laing bagyo nga naghulga sa nasod karon, ang bagyong ‘Quinta’. Wala kini direktang miigo sa Sugbo o Central Visayas. Kagahapon, Oktubre 25, ang typhoon signals tua giisa sa Central ug Southern Luzon.

Apan ang iyang dala nga uwan makaapekto sa dakong bahin sa Kabisay-an. Gani, bisan way pasidaan sa Central Visayas, ang Coast Guard Station (CGS) Central Cebu temporaryong nisuspenso sa tanang biyahe sa mga sakyanan sa dagat sugod kagahapon.

Sumala sa Pagasa Mactan, ang Metro Cebu makasinati og hinay ngadto sa kusog nga pag-uwan ug panugdog tungod sa epekto ni ‘Quinta’ hangtod ugma, Oktubre 27. Tungod niini, dunay hulga gihapon sa pagbaha ug pagdahili sa yuta.

Makahinumdom ba kamo sa dili pa lang duhay nga pagbaha ug lunop sa Metro Cebu niadtong Oktubre 13, Martes? Dili gyud kakompiyansahan ang dagan sa panahon human mokalit lang og kausab ngadto sa grabe sa wa matino nga oras.

Seguro wala usab kadto nga mabalik kadtong makaluluoy nga hitabo sa mga residente sa dakbayan. Dunay kinabuhi nga nakalas. Halapad ang kadaut sa mga kabtangan tungod sa gituohan na yano lang nga pag-uwan.

Maayong mokooperar sa mando sa Disaster Risk Reduction and Management Office (DRRMO) sa matag local government unit (LGU) sa Metro Cebu. Dili lalim, ang pagbasol kanunay gyud nga naa sa ulahi. Simbako lang usab. Busa, lihok na.