KANHI Presidente ug karon House Speaker Gloria Macapagal Arroyo nia sa Sugbo karon, Pebrero 18, sa Sugbo aron paghimo og hearing sa alas 8:00 sa buntag sa Cebu Port Authority (CPA) bahin sa House Oversight on transportation aron pagtino alang sa pagpalapad sa Strong Republic Nautical Highway (SRNH) nga nagkonektar sa mga isla aron mas mominos ang galastuhan sa pagdala o paghatod sa mga produkto ngadto sa merkado ug pagbiyahe sa mga tawo.

Si CPA General Manager Angelo Verdan nagkanayon nga ang House Committee on Transportation ubos sa pagpangulo ni Kong. Cesar Sarmiento buot mopalambo sa Roll-on/Roll-off (roro) system labina sa pag-abli og bag-ong rota human si Presidente Rodrigo Duterte miila niini nga usa sa mga labing barato nga pamaagi sa transportasyon.

Ang SRNH mapatuman sa panahon ni Arroyo dihang siya maoy presidente sa nasod ug si Verdan maoy chairman niadto sa Maritime Industry Authority (Marina).

Dako ang natabang sa nautical highway nga nag-abli og bag-ong rota sa barko gikan sa Mindanao ngadto sa Luzon ug balik nga mas barato ug dali pinaagi sa dagat. Bisan daghan og isyu niadtong administrasyon niya apan maayo gyud nga ekonomiya si Arroyo. Gikan sa SRNH ngadto sa call centers dili malimtan sa iyang panahon sa administrasyon.

Sa hearing karon, ang dakong hagit nga tukion ni Arroyo mao ang matang sa mga pasaheroang barko nga nagbiyahe sa dagatan. Apan mas nakapanuklog ang mga karaang barko o second-hand nga barko gikan sa pantalan aron bag-o tan-awon ug giusab ang desenyo nga mahimong pasaheroan gikan sa pagka cargo ship lang.

Makapasubo nga pamalandugon nga brand new nga barko pasaheroan nga nabiyahe sa nasod. Makaluluoy. Pobre kaayo. Apan ang mga ta-iya sa barko nagpaburot sa ilang bulsa gikan sa kita sa ilang barko nga motirik matag-karon-ug-unya.