GIHULAGWAY ni Bise Presidente Leni Robredo nga pakyas ang kampanya batok sa illegal drugs sa administrasyong Duterte. Nagtumbok siya og data sa drugas nga nasakmit ug sa gidaghanon sa nagtuyok dinhi sa nasod.

Apan mahukman ba ang kampanya sa illegal drugs ni Presidente Rodrigo Duterte sa pagbase lang sa gidaghanon sa illegal drugs nga nasakmit? Di ba sa kampanya sa illegal drugs, daghan pang mga barometro ang basehan.

Gawas sa illegal drugs nga nasakmit, di ba mas maayong iphon usab kon pila ka mga tawo ang nangatanggong kay nadakpan sa pagpamaligya, apil na ang nangakombikto. Apilon usab ang mga tawo nga malampusong na-rehabilitate.

Unya, itandi kini sa performance sa nangaging mga administrasyon, labina sa kapartido ni Robredo nga si kanhi Presidente Benigno Aquino III. Seguradong malabwan ang record ni Aquino ni Duterte bisan pa lang sa unang tulo ka mga tuig sa administrasyon karon.

Kay kon tan-awon og maayo, wa pay presidente sa Pilipinas nga grabeng nakapunting o nakatutok sa kampanya batok sa illegal drugs. Wa pa say nangaging administrasyon nga nakasilhig sa mga badlungong pulis ug anti-drug agents, kini lang nga administrasyon.

Apan maingon ba nga malampuson ang kampanya batok sa illegal drugs ning administrasyon karon? Di tingali maingon nga lunlon kalampusan. Mas maayo tingali nga ingnon nga mas maayo og performance ang administrasyong Duterte batok sa illegal drugs itandi sa nangaging mga administrasyon.

Maingon lang tingali nga malampuson ang administrasyon kon 50 porsyento nga nalimpyo sa mga durugista ang nasod. Apan lisod pa kining himuon tungod kay sa daghang katuigan, napasagdan ang anti-illegal drugs campaign.

Maingon karon nga mas maayo ang performance ni Duterte batok sa illegal drugs itandi sa nangaging presidente, apan di pa maingon nga kini malampuson.