GIDAKOP si Police Major Ildefonso Miranda, kanhi hepe sa Argao Police Station, sa iyang mga kaubang pulis human siya maabti nga nakigdulog sa usa ka babayeng binilanggo sa iyang lawak sa police station.

Matod sa mga tinubdan, niadto pang Nobiyembre nagsugod ang pagpuyo sa binilanggong si Jean Claudia de Guzman Villanueva sa opisina ni Miranda. Duna untay mando ang korte sa pagpa rehabilitate kang Villanueva isip tipik sa plea bargaining agreement, apan wa gituman sa hepe.

Nadakpan si Villanueva sa usa ka buy-bust operation niadtong Agusto sa miaging tuig. Ni-plea bargain siya hinungdan nga nimando ang korte sa pag-rehab kaniya.

Duna diay nitaho nga usa ka opisyal sa Argao kabahin sa relasyon nila ni Miranda ug Villanueva hinungdan nga gi-raid siya sa mga pulis gikan sa Police Regional Office (PRO) 7.

Dunay kalapasan si Miranda nga nahimo isip police official kay si Villanueva usa ka dinakpan. Di pa ordinaryo ang krimen, kay siya dinakpan sa illegal drugs. Mas nakapabug-at kini sa iyang nahimong kalapasan isip hepe ug pulis. Wa pa niya tumana ang mando sa korte.

Sakto man ang panaghigugmaay nilang duha tungod kay puro sila single, way kabilinggan sa kinabuhi. Ilang katungod ang paghigugma. Way bisan usa o bisan kinsa nga makalangkat niini kay ila kining tagsa ka mga pagbati. Ang ilang panaghigugmaay mahimong sayop kon nahigot pa sila sa talikala sa kaminyuon.

Libre silang mahigugma, apan sayop ang ilang mga sirkumstansya. Sayop usab ang ilang gihimong salag sa ilang panagminahalay kay buhatan pa sa kapulisan.

Una, gipa-rehab unta ni Miranda si Villanueva sumala sa mando sa korte. Gihuwat niyang mahuman ang rehab period. Wa niya gipapuyo sa opisina ang babaye, didto ra unta sa sud sa prisohan. Apan unsaon man, nabutaan siya sa naghingapin nga gugma. Pwerte na niyang gubaa.