SA PAGSUGOD sa pagtumaw sa mga positibo sa coronavirus disease (Covid-19) dinhi sa nasod, nagtuo ang mga Sugboanon nga toa ra kini sa Luzon kay wa may bisan usa nga napakita ang Department of Health (DOH) 7. Apan mao diay nga hilom ning aspetuha ang DOH kay diay, wa pa pay nangabot nga test kits. Busa, sa mga nagpakitag simtomas sa Covid, igo ra nilang gi-monitor.

Niadtong higayuna, hilom pa ang DOH kabahin sa test kits. Karon nga naa na ug nia pa sa Cebu ang test center, paspas na silang makahibawo.

Bisan ang mga buhatan sa panglawas sa kagamhanan nagkat-on na, ila nang ginganlan ang mga lugar nga dunay mga kaso sa Covid, labina ang mga barangay diin sila magagikan. Ang mga local government unit (LGU) kanunay nang nag-update sa ilang mga lugar, diin dunay PUM.

Bisan ang pribadong mga ospital nagbutang na og mga impormasyon kon pila ka buok naa sa ilang tugkaran ang mga tawo nga positibo sa mao nga sakit.

Maayo kini nga kalambuan kay pinaagi niini, masayod ang publiko sa mga dapit diin sila magmatngon og maayo. Wa magpasabot nga mahadlok na silang mosud sa tambalanan nga dunay positibo sa Covid, kon di, mas magmatngon na silag maayo nga di mataptap sa mananakod kaayo nga kagaw.

Mao ni ang ganahan ug dugay nang gipangayo sa publiko nga transparency kun kasihag sa gobyerno kabahin sa mga kaso sa Covid. Di sama niadto nga igo rang mosulti sa edad ug gender. Karon, sila na mismo ang naghatag og dugang pang mga impormasyon.

Pinaagi man gud ning mga impormasyon, masayran sa publiko ang tinud-anay nga kahimtang sa mga kaso sa Covid karon, sa ingon magiyahan og maayo kon unsa ang angay nga buhaton. Kay sa mga nasod nga taas ang mga kaso, apan mga tawo kompyansa ra, daghan ang namatay.