MIKATAP sa social media ang kontrobersyal nga CCTV video sa pagkulata sa giingong mga pulis sa tulo ka mga tawo, usa niini ilang gidakop. Ang walo ka mga pulis sa Talamban Police Station, unom kanila maoy giingon nga naa sa video, pangrelibuhan ni Cebu City Police Director Police Col. Royina Garma.

Imbestigahon ang mao nga mga pulis sa Regional Internal Affairs Service (RIAS). Pasakaan sila og kaso kon makit-an nga duna silay kalapasan.

Apan si Garma niingon nga susihon pa kon ang mao nga mga tawo mao ba ang mga pulis sa Talamban. Sa tambay pa nga estorya, pinulis ning sulti ni Garma.

Ang labing lig-on nga ebidensya nga mga pulis sa Talamban ang naa sa video mao mismo ang ilang dinakpan nga si Eddie Basillote.

Si Basillote ang usa sa tulo ka mga tawo nga makita nga gikulata sa mao nga video. Gipakita pa ni Basillote ang iyang mga bun-og dihang gibisita sa Sunstar Cebu sa Talamban Police Station.

Kon wa pa unta dad-a sa mga pulis si Basillote, hayan sayon ra silang makalusot kay di kaayo maklaro ang mga nawong sa mga tawo nga naa sa video. Nagdala sila og ebidensya.

Lisod usab isalikway ang mga pamahayag sa mga kabanay ni Basillote batok sa mao nga mga pulis. Di usab tingali magtumo-tumo ang mga kabanay kay ang ilang kaaway mga pulis. Ning panahon ni Presidente Rodrigo Duterte, suportado kaayo ang kapulisan sa ilang kampanya. Nasayod ang banay ni Basillote kon unsa kalig-on ang ilang kontra.

Gikinahanglan nila ni Garma ug Police Regional Director Debold Sinas nga mohimo og lakang batok sa mga pulis nga naa sa video. Dako kaayo og kauwawan ug naghatag og negatibong imahe sa kapulisan ang ilang gihimo. Sa usa lang ka pamilok ilang natilok ang pogi points sa kapulisan.

Kon di man sila taktakon sa serbisyo,maayong masuwayan ang ilang kaisog sa panggubatan sa Sulu ug Basilan.