PASTILAN. Kon tinuod man gani ning seryusong alegasyon ni Baguio City Mayor Benjamin Magalong nga naglambigit ni Philippine National Police (PNP) Chief General Oscar Albayalde sa giingong mga ninja cops, dakong tamparos kini sa kampanya ni Presidente Rodrigo Duterte sa pagsugpo sa gidiling drugas sa nasod.

Tiaw mo bay ang labing taas og ranggo sa PNP nga gisaligan sa presidente nga moayuda kaniya sa kampanya mao ra usab diay ang nakig-abin sa mga drug lords sa pagpayuhot sa gidiling drugas.

Daghang nanggawas nga mga rebelasyon atol sa Senate hearing sa niaging adlaw nga daw nagtumbok ni Albayalde nga maoy tigpaluyo niadtong mga tinugyanan sa balaod nga nag-recycle sa mga shabu nga nasakmit.

Gipanghimakak man tuod ni Albayalde ang maong pasangil apan daw og mas bug-at ang mga pamahayag ni Magalong kay motukma man sa sitwasyon sa mga panghitabo.

Nagpungapunga si Albayalde sa pagtubag sa pulipuli nga pangutana sa mga senador, ilabi na nila ni Sen. Richard Gordon, Sen. Franklin Drilon nga gitimangan usab ni Sen. Panfilo Lacson.

Nakapalig-on sa alegasyon ni Magalong mao usab ang pagbutyag ni Philippine Drug Enforcement Agency (PDEA) chief Director General Aaron Aquino nga nanggilabot si Albayalde sa giingong 13 ka ninja cops nga tangtangonon unta tungod sa kuwestiyonabling anti-drug operation sa tuig 2013.

Matawag nga mga alegasyon pa man tuod kining gipangyagyag karon sa senado ug nagkinahanglan pa og dugang ebidensiya hinaot nga dili mawahing ang direksiyon sa imbestigasyon kay mora paingon na kini sa ganghaan sa kamatuoran.

Kon way gitagoan si Albayalde ug andam siyang manalipod batok sa mga pasangil, isip delikadisa, mas maayong temporaryong mobakante lang una siya sa iyang katungdanan.