PASIDAAN sa mga kandidato sa barangay nga nagtakoban sa ilang personal nga interes ug kadtong nagtakoban sa pagka maayong tawo ning panahon sa kampanya sa eleksiyon sa barangay apan kaabin o protektor sa sindikato sa gidiling drugas. Segurado nga masikwati kamo sa pressure gikan sa kagamhanan ug grupo nga inyong gipanalipdan.

Dili ba ang Philippine Drug Enforcement Agency (PDEA) nipahibalo nga naghupot sa listahan sa mga opisyal sa barangay sa tibuok nasod nga nag-abuso o miyembro sa sindikato sa gidiling?

Dugang pa, ang Department of Interior and Local Government (DILG) nangandam na sa pagpasaka og kaso batok sa kapin sa 600 ka mga opisyal sa mga barangay human walay igong gihimo uban sa hugot nga kampanya sa administrasyon ni Presidente Rodrigo Duterte batok sa gidiling drugas, bisan sa ilang pag-organisar sa Barangay Anti-Drug Abuse Councils (BADAC).

Si Interior Undersecretary Martin Diño niasoy sa Unang Balita sa GMA 7 nga ang DILG nipasaka na og kaso batok sa 15 ka mga opisyal sa barangay tungod sa wala pag-organsar sa anti-drug councils.

“Meron pang 600 na nag-organize ng BADAC, hindi naman functional,” dugang ni Diño sa Unang Balita, uban sa pagbutyag sa listahan sa 600 barangay officials nga lahi sa listahan nga naa sa PDEA nga nalambigit sa gidiling drugas.

Si DILG officer-incCharge Secretary Eduardo Año bag-o lang nimando sa tanang barangay officials sa pagsumiter sa inventories of projects ug gihuptang pundo isip kabahin sa “lifestyle check” aron pagtino nga walay korapsiyon sa barangay.

Kon limpiyo ang imong konsensiya sa pag-alagad sa barangay, dili kamo mahadlok sa pagdaug sa piniliay. Ang dunay dautang motibo sa pagkandidato, sibog na lang mo aron dili masulod sa sitwasyon nga murag bibingka, init sa ibabaw ug ilalom.