NAMATI si Cebu City Mayor Edgardo Labella sa kusog nga bul-og katawhan nga mibatok sa hukom sa Sinulog Foundation Inc. (SFI) nga naghatag sa usa ka local cable station og eksklusibo nga katungod sa coverage sa Sinulog showdown sa Cebu City Sports Center (CCSC).

Isip amahan sa dakbayan, tukma ang lakang ni Labella nga daling nakigtigom sa mga sakop sa hunta sa SFI aron pagpangita og dinaliang solusyon sa paghupay sa kasuko sa katawhan mugna sa unpopular nga hukom sa SFI.Malampuson ang mayor sa pagwagtang sa “exclusive coverage” sa kontrata ug gitugotan na ang ubang media companies sa pagmuntar sa coverage sulod sa CCSC aron paghimo sa ilang naandang coverage.

Kini human sa grabeng reaksiyon gikan sa lokal nga media nga nasurprisa sa hukom sa SFI, mga komentaryo sa kilidkilid sa bisan asang sektor ug ang nag-trending sa social media nga kasuko sa netizens.

Wala putla ang kontrata sa SFI ug MyTV diin ang naulahi hatagan og prayoridad sa pagmuntar sa ilang mga kahimanan human giingong wala giuli sa SFI ang gibayad sa MyTV.

Dili na lang kita mokuwestiyon sa kagamay sa gibayad sa MyTV ngadto sa SFI human walay bugti nga kantidad sa salapi sa pagka makahuluganon sa kalihokan sa kasaysayan sa mga Sugbuanon ug Kristiyanismo sa Asya.

Ang libre o walay limitasyon sa coverage sa media usa sa dakong hinungdan nga naila ang Sinulog Festival sa tibuok kalibotan. Apan gisuwayan sa pag-esklusibo sa usa lang ka gamayng kompaniya sa telebisyon?

Maayo nga dunay mayor nga midapig sa katawhan. Ikaduha na kining isyu sa Sinulog nga nipatunga ang mayor, una ang clamping nga temporaryong gisuspenso tungod sa hangyo sa katawhan. Daghang salamat, Mayor Labella. Pit Senyor!