KINI ang klaro, dili tanang sidewalk vendors buluyagon. Kini ang walay klaro, ang pagsustiner sa polisiya alang sa sidewalk vendors. Karon estrikto ang awtoridad apan hinayhinay nga magkahuyang sa pagpatuman sa lagda, busa, ang mga mamindahay mogara.

Sa dakbayan sa Sugbo, dili bag-o ang paghawan sa sidewalk sa mga manindahay ug ang giingong estrikto nga pagpatuman balaud. Apan miinit na usab ning ulahi tungod sa panawagan ni Presidente Rodrigo Duterte sa pagpanglimpiyo sa kadalanan batok sa tanang babag sa hapsay nga transportasyon.

Dili bastabasta ang maong panawagan human gisalo sa kamando sa Department of Interior and Local Government (DILG) ngadto sa mga lokal nga opisyal. Masuspenso ang mga opisyal nga mapakyas sa pagpagtuman sulod sa unom ka buwan gikan sa pagpakamanaug sa kamandoan sa miaging buwan sa Hulyo 2019.

Samtang, si Mayor Isko Moreno sa dakbayan sa Manila gidayeg ug nahimong ehemplo sa tinong “politcal will” paglimpyo sa dan sa Divisoria Market sa ug uban bahin sa sentrong dakbayan sa nasod.

Ug wala magpauwahi ang harang dakbayan sa nasod, si Mayor Edgardo Labella nimando ni Raquel Arce, pangulo sa Prevention, Restoration, Order, Beautification and Enhancement (Probe) sa pag-abog sa sidewalk vendors.

Sa ulahing kalamboan, gikan sa 200 ka sidewalk vendors, ang Probe nitugot sa pagpabalik sa katunga kanila nga nipasar sa “rekisitos” ug mga sakop sa Gugmang Alyansa Sumbanan sa Asenso (Gasa). Hinaut dili lang kadtong nalista sa nagsuporta kang Labella sa eleksiyon.

Kon klarong malahutayon ug patas ang pagapatuman sa balaud ug polisiya sa sidewalk, seguradong magtamod ang manindahay nga naningkamot sa pagbugtaw sa idlas nga haruhay nga kinabuhi ubos sa matarong nga pamaagi.

Dili sila hayop, may pagbati ug takos sa atong pagmahal.