Gikinahanglan nga tarungon og maayo sa kapulisan ang pag-imbestigar sa kamatayon ni Ritchie Nepomuceno aron mawagtang ang pagduda nga siya gipatay aron mahilom ug ma huyang ang kaso.

Tungod sa reklamo batok kang anhing Police Staff Sergeant Celso Colita ug sa iyang 11 ka kaubanan, naguba ang imahe di lang sa kapulisan sa Sawang Calero Police Station, apil na ang mga pulis sa Cebu City ug Sugbo sa kinatibuk-an.

Bisan pa og gilambigit si Nepomuceno sa illegal drugs, di gihapon kini maglimpyo sa imahen sa kapulisan kay di lang baya siya ang nireklamo batok sa mao nga mga pulis, nay pay laing duha. Nisamot pa human gipatay si Nepomuceno.

Ang paghikog ni Colita nipasamot pa hinuon sa mga pagduda sa publiko nga dunay katinuoran ang mga alegasyon batok sa mga pulis. Ang pag-ila sa killers ug kinsa ang mastermind mao lang ang makatangtang sa mga pagduda ug makatibhang sa pagkawala sa pagsalig sa katawhan ngadto sa kapulisan. Kon ilang paspasan ang pagsulbad sa kaso ug dunay makiha, kana dako kaayo og puntos nila.

Apan kon ang ilang imbestigasyon sama rag dagan sa mga kaso sa pagpatay, kansang records giabugan ug giagop-op na, lisod nang mahiuli pa ang respeto ug pagsalig sa publiko. Kahadlok, di respeto, ang mopatigbabaw nga pagbati sa publiko.

Ang bag-ong impormasyon nga giingon nga drug lord nga kapuyo ni Nepomuceno ang nanghulga kaniya, angay nga nganlan sa kapulisan, hukasan sa iyang pagkatawo. Kon di gud kini nila nganlan, ibutyag ang drug network, magduda gihapon ang publiko nga ila kining gitabunan kay sila nakabenepisyo man. Di kini kalikayan.

Busa, way laing kapaingnan ang kapulisan, kinahanglan nga ilang sulbaron sa labing dali ang pagpatay ni Nepomuceno, ilhon ang utok ug hukasan ang pagkatawo. Kon tinuod kini nga drug lord nga naa sa bilanggoan, nganong di man nganlan?