SEGURO mas daghan o halos 99 porsiyento sa populasyon sa Sugbo ug bisan sa tibuok nasod, gusto nga mopatigbabaw ang kahusay ug kalinaw, luwas sa krimen ug susamang linuog nga kalihokan sa mga dautang elemento sama sa nahitabong dayag nga pagpanulis sa pipila ka pawnshops ug money changer sulod sa JCenter Mall sa dan A.S. Fortuna, Barangay Bakilid, Dakbayan sa Mandaue, pasado alas 7:00 sa gabii niadtong a Sabado, Oktubre 19, 2019.

Nakurat ang Sugbo sa kalit nga taho nga taudtaod nang wala makasinati sa maong estilo sa pagpanulis sulod sa mall. Nagpamatuod kini nga nagpahipi pa ang uno porsiyento nga dautang elemento. Naniid lang. Nagpaabot sa ilang paborabling panahon sa pag-ataki. Makaluluoy ang mga enosenteng sibilyan nga napagan. Salamat sa kahitas-an nga way nakalas nga kinabuhi sa mga nanuroy sa mall ug habig sa awtoridad.

Gikataho nga upat na ka mga tulisan ang napatay atol sa hot pusuit operation sa kapulisan apan dili kita hingpit nga makapanghimaraut sa ilang kamatayon gawas sa pagtuaw nga dili usab maayong pasanayon ang maong matang sa mga binuhat ning kalibotan.

Tinuod gamay lang kining dautang elemento apan ang impact o gibug-aton sa epekto sa ilang gipanghimo makatay-og sa pagbati ug kinabuhi sa mayoriyang nagtamod sa kalinaw ug naningkamot nga molambo pinaagi sa kaugalingong singot ug kusog bisan sa hinayhinay nga paagi ug walay gitumban nga katungod sa uban.

Dili ba mayoriya kita? Nganong dili nato kini gamitong bintaha? Dili kitang tanan kinahanglang aktibong moapil sa aksiyon sa operasyon, apan kita nga naglubog sa tagsatagsa nato ka komunidad dako og matampo sa pagpaniid sa mga dautang lihok sa tawo o grupo ug kini sekretong itaho sa awtoridad.

Importanteng aspeto ang tabang sa publiko sa pagsumpo sa kriminalidad ug pagtunhay sa kahusay ug kalinaw.