Grabe ang pagsaka sa mga kaso sa coronavirus disease (Covid-19) sa Dakbayan sa Sugbo. Moabot og 300 porsyento karong semanaha kon itandi sa miaging semana.

Ang Department of Health (DOH) mihatag og pipila ka mga hinungdan sa posibleng pagsaka nga naglakip sa: grabeng contact tracing nga giapil na bisan ang second generation sa close contacts, pagluag sa border controls, luag nga pagpatuman sa minimum health protocol ug pagdagsang sa mga tawo sa mga establisemento nga posible usab milugak sa pagpatuman sa mga protocol.

Niini, di diay mabasol ang Siyudad sa Sugbo kon gipahugtan og balik ang mga border control kon mismo ang DOH nagtuo nga usa kini sa mga hinungdan kon nganong misaka ang mga kaso sa Covid-19.

Di usab angay hikalimtan nga sa tanang mga siyudad, ang Cebu City mao ang sentro sa mga patigayon hinungdan nga daghan ang manulod. Dungan sa paglihok og maayo sa ekonomiya mao ang pagdagsang sa mga tawo. Busa, gikinahanglan ang pagpahugot sa pagpatuman sa mga health protocol.

Gikinahanglan nga di lugakan sa Siyudad ug kapulisan ang pagpatuman. Di lang gani sa border control, kon di bisan sa kasuokan sa mga barangay adtuon. Kay naa sa mga suok ang daghan usab nga mga sipat nga ang mga awtoridad lang ang bantayan.

Doble usab ang suwab niini kon kini ang ipatuman. Mahimo usab kining makapaislag ug makapahadlok sa mga criminal.

Diay, taliwa ning pagsaka sa mga kaso, makita nga di maayo mokompyansa kay tan-awa, sa usa ka pamilok, gipilog katulo ang gidaghanon.

Kon mipahugot man sa pagbantay ang gobiyerno, alang ra usab kini sa atong kaayuhan.