BISAN kon dili magbase og opisyal nga data sa kagamhanan o gikan sa pribadong survey agencies, mabanabana nga grabe ang pagsutoy sa gidaghanon sa way trabaho ning panahona. Resulta sa halapad nga lockdown sulod sa dul-an sa tulo ka buwan sa paningkamot nga pagpaminos sa kaso sa coronavirus disease 2019 (Covid-19).

Apan sa pikas bahin, kini ang hinungdan nga nahimong himatyon ang pamatigayon.

Usa ang Pilipinas nga apektado sa krisis sa Covid-19. Dunay kompaniya nga nanira. Nanangtang og mga kawani ngadto sa katunga sa ilang pwersa. Liboan ang repatriated overseas Filipino workers (OFWs) ug seafarers.

Kining tanan napuno sa daan nang walay trabaho ug liboan ka bag-ong graduwado sa kolehiyo nga nangita og trabaho. Dili ba klaro nga misutoy ang gidaghanon sa walay trabaho?

Giluagan na ang kuwarentina ngadto sa general community quarantine (GCQ). Gilauman nga mosunod ang establisar sa lihok sa komunidad nunot sa nag-ung-ong nga pagpatuman sa bag-ong normal nga pagpakabuhi.

Apan sa unang duha ka adlaw sa ECQ sa Metro Cebu, Hunyo 1 ug 2, ang sektor sa transportasyon wa maandar tungod sa kadaghang “kuskos balungos” sa Land Transportation Franchising and Regulatory Board (LTFRB) 7.

Ngano ning ulahi lang nila gipatuman ang daghang rekisitos? Apiki sa panahon. Ang ubang drayber ug operators sama sa namati aron dili maalkanse sa pasada nga katunga lang ang pasakyon sa kapasidad sa sakyanan.

Mao kini hinungdan nga mingaw ang mga establisemento ug mga mall nga nangabli. Way igong publikong sakyanan. Dili ba kaha alkanse ang pagpangabli sa mga establisemento?

Maayo nga gawas sa pagtutok sa pagsanta sa Covid-19, patas ang kaimportante sa paglatid og estratihiya sa nasudnon ug mga lokal nga kagamhanan sa pagmugna og daghang trabaho.