TRAPIK. Karon bisan asa dinhi sa Metro Cebu nga naglangkob sa siyudad sa Naga, Talisay, Cebu, Mandaue, Lapu-Lapu city, ug Danao,ug lungsod sa Minglanilla, Consolacion, Liloan, ug Compostela, di na ikahibung ang grabe nga trapiko. Mas makurat pa ang mga motorista kon dunay adlaw nga luag kaayo ang trapiko.

Ang tanan nga problema sama sa trapiko duna gyuy kasulbaran. Ang nasudnong kagamhanan nagpahibawo nga gisugdan na ang pagtrabaho sa Metro Cebu Expressway nga maggikan sa Naga city ug motapos ngadto sa Danao city nga motadlas sa kabukiran sa lungsod sa Minglanilla, Talisay City, Cebu city, Mandaue City, Consolacion, Liloan, Compostela hangtud sa Danao city.

Kining Metro Cebu Expressway, nga matud pa ni DPWH 7 Director Edgar Tabacon, humanon sa dili matapos ang termino ni Presidente Duterte sa tuig 2022, maoy nag-una nga solusyon sa grabe nga problema sa trapiko sa Metro Cebu tungod sa kadaghan na sa mga sakyanan ug ang kadalanan mao lang gihapon ang gilapdon.

Sa laing bahin, ang lungsod sa Minglanilla, nga grabe ang trapiko sa oras tingtrabaho ug pamauli, mipasar na og ordinansa nga maguroy sa ilang manakop ang mga sakyanan nga moparking sa dapit nga gidili ang parking.

Maayo unta kon mosunod ang Talisay, Consolacion, Lapu-Lapu, Liloan, ug Compostela sa gibuhat sa Minglanilla. Ang illegal parking sa highway usa na sa mga hinungdan sa kahinay sa dagan sa trapiko.

Ang highway padung sa norte sa Cebu mitadlas sa lungsod sa Consolacion, Liloan, Compostela ug Danao city. Bisan pa sa balaod nga nagdili og parking sa highway, ang mga mananakop molingiw lang sa mga sakyanan nga maoy usa sa mga hinungdan sa teribli nga trapiko.

Ang lain nga hinungdan sa grabe nga trapiko mao ang kakuwang nga disiplina sa mga drayber. Di ni pagtamay sa mga drayber sa tricycle ug PUJ apan kadaghanan kanila di motuman sa lagda sa trapiko. Ang way disiplina sa mga drayber usa sa mga hinungdan nga grabe ang trapiko sa Lapu-Lapu sa dapit nga naa ang mga mall.

Ang kanunay nga reklamo sa mga tag-iya sa resorts sa Lapu-Lapu ug sa mga moadto sa resort mao ang kahinay sa dagan sa trapiko sa tanan nga adlaw labina sa dalan Max Patalinghug gikan sa una nga tulay padung sa Marigondon. Anha mograbe ang trapiko ig-abot sa usa ka mall nga nahimutang sa eskina diin nagpundok ang mga tricycle.

Gani, gibutangan na og koral nga metal ang tunga sa dalan aron di na makaliko bisan asa ang mga tricycle. Apan, ang linya sa trapiko taas gihapon tungod sa kadaghan na sa sakyanan