LIBRE? Dunay maayong kalamboan alang sa mga detinado sa Cebu City Jail (CCJ) nga nag-atubang og kaso sa paghupot o gamit sa ilegal nga drugas nga mahimo na sila nga moangkon sa salaud unya makagawas na sa prisohan apan kinahanglan nga mopasar sila sa drug test.

Ang nagkalain-lain nga korte dinhi sa dakbayan sa Sugbo mi-orden nga ang duolan sa 1,000 nga piniriso sa CCJ nga nag-atubang og kaso sa ilegal nga drugas apan ang sentensya dili pagkapriso hangtud sa iyang kinabuhi nga ipaubos sa drug test ug sa drug dependency examination (DDE) aron makaapil sila sa plea bargain program sa hudikatora. Kining bag-o nga programa nga gipadangat sa atong Korte Suprema usa ka dako ug maayo nga solusyon sa kapuno na sa mga kalabuso. Ang CCJ nga mosulod lang unta og usa ka libo ka piniriso aduna nay dul-an 5,000 ka binilanggo.

Hinuon, dunay mga panginahanglanon nga subayon ang piniriso nga mahimo nga moapil ani nga programa. Usa niini mao ang drug testing aron mahibaw-an kon ang iyang adiksyon normal, dili grabe o grabe ba.

Ang rekomendasyon sa doctor nga nag-eksamin sa akusado og ilegal nga drugas maoy basihan sa korte kon madawat ba siya sa programa sa plea bargain. Nakita na tingale sa atong hudikatora kon unsa ka daghan ang mga detinado sa kaso nga ilegal drugs.

Ang kadtong maingon nga normal ipagawas sa korte sa prisohan apan isulod sa gitawag nga community-based rehabilitation center. Ang kadtong matawag nga grabe pa ang adiksyon adto isulod sa drug rehabilitation center nga anaa sa Argao, nga gidumala sa Department of Health.

Sa 1,000 nga nag-atubang og kaso sa ilegal drugs pila kaha ang mopahimus ani nga programa? Basin ang kadaghanan kanila mahadlok nga inig gawas nila sa prisohan birahan unya sa ilang kontra sa negosyo. Sama kaniadto sa kusog pa ang vigilante dinhi sa dakbayan nga ang mga dinakpan sa kaso nga panulis ug uban pa di na mopiyansa kay hadlok patyon inig gawas sa prisohan.

Kining plea bargain program sa hudikatora, sa akong panglantaw, usa ni ka proseso agi og subay sa lagda sa rehabilitasyon sa mga dunay bisyo sa ilegal nga drugas kay ang pagtan-aw man gud sa atong katilingban sila mga biktima man.

Hinuon dili tanan nga nag-atubang sa maong kaso makaapil aning programaha. Kadto ra man kaso nga dili life imprisonment ang sentensya ang makaapil kon kadtong gikiha basi sa Section 11, RA 9165 o Comprehensive Dangerous Drugs Act of 2002 nga ubos sa singko gramos nga shabu kon ilegal nga drogas ang gihuptan.