WAY ayo. Niadtong Dominggo nagkabuang kog pangita sa abli nga opisina sa PLDT aron pagbayad sa akong balayranan sa telepono ug internet connection bisan og wa pa ko kadawat sa akong binuwan nga bill kay giputlan na ko sa internet.

Miadto ko sa PLDT Mandaue apan sirado ug way tawo bisan gwardiya. Nanimpad ko sa PLDT Mabolo nga maoy akong naandan nga adto mobayad bisan og adlawng Dominggo kay abli.

Apan sipyat gihapon ko kay giundang na diay ang Sabado ug Dominggo nga panawat sa bayad sa miagi pa nga tuig, matod pa sa gwardiya nga akong nahinabi.

Misuway og tabang nako ang gwardiya sa pagtawag sa PLDT assistance gamit sa ilang telepono aron mangutana ko sa akong bayronon apan ang ilang answering machine gawas nga paspas ang mandasyon igo ra ko nga gibalibaran nga daut ang sistem human na nako makompleto ang detalye sa impormasyon nga gipangayo.

Sa miagi nga mga buwan di jud ko masipyat og bayad sa akong PLDT ug internet bill sa di pa moabot ang deadline kay makadawat na man ko sa sayo pa sa akong online bill. Apan niadtong Disyembre 2018 ug karon Enero 2019 wa na ko makadawat sa akong bill.

Gani, nagpadala kog daghan nga reklamo sa PLDT sa miaging tuig pa kay nagsige ko og bayad sa tibuok nga bayronon apan di ko makahibawo sa detalye sa akong balayranan tungod kay di na ko maabli ang gipadala nga bill sa akong email. Apan hangtod karon wa pa jud ko makadawat sa tubag sa PLDT.

Sa akong pakisusi akong nahibaw-an nga mao diay wa nay Sabado ug Dominggo nga modawat sa bayad sa opisina sa PLDT sa Mandaue ug Mabolo kay, matud pa, nanangtang og mga empleyado ang PLDT.

Nagpasabut ba ni nga wa nay ayo ang serbisyo sa PLDT sa ilang mga subscriber sa telepono ug internet? Imbis kay nag-fiber optic na hinuon ang linya sa PLDT natulibag na hinuon ilang serbisyo? Mao na ni!

* * *

LIBRE. Ang mga residente sa Brgy. Sambag 1 niadtong Dominggo nakadawat og libre nga medical examination ug tambal gikan sa mga boluntaryo nga mga doktor sa gipatigayon nga medical mission sa Rotary Club Cebu South (RCCS) inabagan sa Yotsukaido Rotary Club, ang sister club sa RCCS, Opascor, Brgy. Capt. Aileen Guardo ug sa First Baptist Church diin didto gipatigayon ang medical mission sud sa ilang eskuylahan.

Ang tinuig nga medical mission sa RC Cebu South pagahimuon sa kada katapusan sa buwan sa Enero atol sa pagbisita sa Yotsukaido Rotary, nga taga Japan, matag tuig.

Ang Yotsukaido Rotary naghatag og ayuda nga pinansyal alang sa Tulay Day Center, Tulay, Minglanilla, nga proyekto sa RC Cebu South ug Yotsukaido.