Samtang nagkainit na ang pulitika tungod sa umaabot nga piliay sa pagka presidente sa Mayo 9, 2022, nagkadaghan usab ang natakban sa Covid-19 tungod sa Delta variant. Unya naa pay isyu sa korapsyon, nga giingong binilyon ang nabayran sa pagpamalit og gamit alang sa mga medical frontliners.

Sa miaging semana, gisugdan ni Presidente Duterte og bira ang oposisyon sama ni Sen. Dick Gordon, chairman sa Senate blue ribbon committee, nga nag-imbestigar sa binilyon nga pundo alang sa Covid-19 pandemic, ug si Sen. Ping Lacson, nga usa mga senador nga way lipodlipud mosulti batok sa isyu sa korapsyon sa Department of Health (DOH) sama sa pagpamalit og facemask, face shield ug PPEs.

Gisaway ni Duterte si Gordon sa gipahigayon nga imbestigasyon sa Senate nga matod pa ni Presidente Duterte dili alang sa katuyoan nga magpanday og balaodnon apan alang sa personal nga katuyoan ni Gordon, nga nagplano modagan pagka bise presidente sa sunod tuig.

Nadiskobrehan sa Senate blue Ribbon committee, nga ang Pharmally Pharmaceutical, nga maoy nakakuha og total nga P7.9 bilyon nga kontrata sa goberno, usa ka gamay nga kompaniya ug usa sa mga stockholder wanted sa Taiwan. Tungod niini, matod pa ni Gordon, morag natarantar ang Presidente sa gipagawas nga TV footage diin nakig-meeting ning mga tawhana ni Presidente Duterte. Gani, dunay mga pangagpas, nga ahente ra ning Pharmally. Hayahaya sa nakakwarta.

Niadtong Dominggo, Sept. 5, ang DOH nakatala og kapin sa 20,019 nga bag-o nga kaso Covid-19 sulod sa tolo ka adlaw tungod sa Delta variant, nga mikatap na sa tibuok nasud. Apan bisan pa aning taho sa DOH, naay gihapon mga tawo nga dili magpabakuna kay mas nahadlok sa epekto sa bakuna kay sa matakdan sa coronavirus.

FOOD CATERER

Nakurat ko sa gipagawas ni Art Barrit sa social media, nga migawas usab dinhi sa SunStar nga ang usa ka gamay nga food caterer nakakuha og minilyon nga PO (purchase order) sa Dakbayan sa Sugbo sa pagsuplay og pagkaon. Kinsa kahay gipakaon ani no?

Nahikatawa ko, nga wa mahimuot, kay abi nako didto ra nahitabo sa PS-DBM, nga midaug ang Pharmally sa bidding batok sa mga dagko nga mga kumpaniya nga dunay kasinatian na sa kontrata sa kagamhanan. Naa sad diay diri sa Sugbo, nga sama ato?

Di sad ko motuo nga paukyab lang ni Art Barrit ang iyang gipagawas sa social media tungod kay duna man siyay tinubdan ug dunay ebidensya. Unya, ang katuyoan maayo kay aron makorehian kon nasipyat ang City Hall ani nga kontrata.