TALIWA sa krisis sa mga negusyante tungod sa pagkalugi ilang negusyo gumikan sa Covid-19, gikinahanglan silang makabarog sa pagbalik.

Sa akong interview ni 2nd district Provincial Board Member Tata Salvador, iyang gipatin-aw nga migahin og P100 milyunes ang buhatan ni Gobernador Gwen Garcia, alang sa legislative department.

Si Salvador, naila nga “Himsog” tungod sa iyang programa nga “Gusto ko Himsog Ka,” mipahibawo nga ang P100 milyunes ang pagabahinon.

Gipatin-aw ni Salvador, nga P15 milyunes alang sa buhatan ni Bise Gobernador Junjun Davide ug tag P5 milyunes os sa mga board member.

Apil sab sa tagaan mao ang mga opisina sa mga ex officio member Sangguniang Kabataan (SK), Councilors League ug Association of Barangay Captains, matod ni Salvdor.

Ang katin-awan ni Salvador iyang gihimo, sukwahi sa report nga akong nadawat (Agila) nga ang opisina ni Davide maoy gitahasan sa programa sa Sugbo Negusyo.

Ang pag-adto diay sa mga staff sa opisina ni Davide sa kalungsoran sa Sugbo, apil na ang upat ka mga lungsod sa Isla sa Camotes ang budget para kuhaon sa iyang P15 milyunes.

Maayo ang gihimo ni Davide, kay sila maoy nagpaduol sa mga tawo aron mahatagan og porma ug ma-screen kon si kinsay kuwalipikado.

Si Salvador niingon nga ang makapahimulos sa maong programa mao ang mga negusyante nga na-alkanse tungod sa pandemic sa Covid-19.

Gibahin sa tulo ka kategoriya ang makadawat. Category A-P50 mil, Category B-P20 mil ug P10 mil ang Category C.

Ang buot pasabot sa kategoriya gibahin alang sa mga dagko nga negusyo, gamay ug sa laning gamay nga negusyante nga naalkanse sama sa micro, small, medium enterprise kun MSME.

Samtang, matod ni Salvador, ang budget sa iyang buhatan nga P5 milyunes ipaagi ngadto sa mga barangay kapitan alang pagpili sa maka-benepisyo.

Matod ni Salvador, gusto niya nga ang makadawat kadtong kuwalipikado ug di gusto nga dunay ipalabi sa paghatag og tabang.