Para nako angayan lang sab nga moluwat og hait nga mga pulong si Cebu City Mayor Edgardo Labella.

Wa gud mapasar ang P10.8 bilyon para sa tuig 2021 tungod sa pagbabag nila ni Konsehal Alvin Dizon.

Gipikhan bitaw ni Labella si Dizon nga samag agukoy nga mokalit lang og tunga ug unya kalit lang mawala kay motago sa lungag. Si Dizon klaro kaayo nga ulipon ni kanhi Cebu City mayor Tomas Osmeña ug tigbabag sa maayong katuyoan sa gobyerno ni Labella.

Si Dizon gihimong pulitiko ni Tomas. Kanhi aktibista man unta ka, Konsehal, nga tiglaban sa interes sa katawhan .

Apan unsang pagka butanga dili naman interes sa mga tawo imong gilabanan kay nagpatuta na man ka sa pulitiko.

Tig martsa mo kaniadto sa kadalanan aron matubag ang gikinahanglan sa mga tawo apan karon nagpa-ulipon kag tawo. Morag nahimo kang kataw-anan kay wala na imong prinsipyo nga gibarugan sukad kaniadto nga sa kadalanan ka makita.

Samtang kanang intelligence fund nga gipangayo sa mayor, hunahunaa sab ninyo, wala man na gitago ni Labella.

Nakaplastada na para sa mga galastuhan ug wa gamita sa personal niiining katuyoan.

Samtang kanang liquidation sa P3.5 bilyon nga gigasto sa Covid makapaabot man kana.

Kaysa inyong isakripisyo ang budget nga gikinahanglan karong mga panahuna sa pandemic ug ubang mga proyekto.

Dizon, balik sa karsada kon ingon man lang niana imong mentalidad nga mitotoy kag pulitiko.

Sa pagkakaron, angay malipay ang kinatibuk-ang konseho sa dagan sa kaso sa Covid-19 nga ubos kaayo.

Di ba tipik ug kabahin man kamo niana sa kampanya ni Mayor Labella nga nahimong malampuson? Hunahunaa ninyo og maayo nga kining tanan para sa katawhan.

Text: 09235562777 Email: efrenlonzon71@gmail.com