PAITA sa kahimtang sa National Bureau of Investigation (NBI) 7 kay gitagaan og labad sa ulo ni Presidente Rodrigo Duterte.

Sila karon ang nag-imbestigar sa pag-ambush-patay ni Mayor David Navarro sa lungsod sa Clarin, Missamis Occidental.

Maldito gud ning atong tinahud nga Presidente human nagduda ug hapit miangkon nga ang kapulisan maoy suspek sa pagpatay sa mayor dinhi sa siyudad sa Sugbo.

Ang kalbaryo gipas-an karon sa NBI-7, sa pagpangita sa mga suspek ni Navarro. Ang kahimtang sa NBI morag nangita og dagum nga nawa sa tunga sa lasang.

Matud pa, gipatay ang mayor kay anaa ang ngan sa narco list ga gihuptan sa Presidente ug dunay koneksyon sa Kuratong roberry group.

Kon imong tan-awon ang sirkumstansya sa kaso, morag hanap nga matagaan og kasulbaran ang kamatayon sa mayor.

Pero atong paabuton ang paningkamot sa NBI sa pag-handle sa kaso. Sa nadawat nakong report, ligdong ang mga tawo karon sa NBI ikompara kaniadto.

Matod pa sa reklamo nga akong nadawat dunay mga opisyal sa NBI-7 nga gibalhin na sa laing lugar ang nanghilam-os sa isyu sa pangurakot mao nga ilang giinitan.

P20M gihatag

Para nako maayo ang gihimo nila ni 2nd district Board Member Tata Salvador ug 6th district PB Member Glenn Soco sa hiniusang resolution nga napasar atol sa session.

Pinaagi sa paghatag og katungod ni Gobernador Gwen Garcia sa probinsya sa Sugbo, makapadala og financial assistance sa mga biktima sa linog sa Mindanao ang Kapitolyo.

Sila si Salvador ug Soco aktibo nga nagsuporta sa mga programa ni Gwen sa Kapitolyo, namahayag nga gikinahanglan ang tabang.

Dakong dungog sa mga Sugboanon ang pagtabang sa Probinsya sa Sugbo, labing adunahang lalawigan.

Abante Boljoon

Andam nga motubag sa atong mga pangutana atol sa one on one interview sa Agila si Mayor Merlou Derama sa lungsod sa Boljoon. Matud sa mga reklamo, wa makairog sa paglambo ang lungsod kay hangtod karon nagpabilin pang 5th class municipality.