KATAPUSAN nakong nabasahan sa mga pamahayag ni Presidente Rodrigo Roa Duterte nga wa siya makauyon nga modagan pagka presidente ang iyang kamaguwangan nga anak nga si Davao City Mayor Inday Sara Duterte-Carpio.

Apan samtang tua karon nagpahuway ang Presidente sa Davao, kalit nga nahimong visible si Mayor Inday Sara dinhi sa Sugbo.

Unang istorya nga atong nadunggan mao ang usa ka hilom nga pag-anhi sa Sugbo sa miaging semana apan kagahapon, si Inday Sara ang labing importanteng dinapit ni Jun Lim, ang CEO sa Lite Shipping.

Gisubhan kagahapon ang MV Lite Ferry 5 nga modagan sa rutang Samboan-Dipolog sulod lang sa upat ka oras.

Nagkanayon si Jun Lim, dihang gi-interview pinaagi sa FB Live ni Mitch Palaubsanon sa The Freeman nga gisugdan sa Lite Shipping ang pag-operate sa rutang nga Samboan-Dapitan mga 10 na ka tuig nga milabay. Mas molambo pa kining ilang bag-ong ruta.

Ang Lite Shipping man diay ang nag-una sa pagpalambo sa mga ruta nga nag-connect sa Sugbo ug Mindanao.

Alang kanako, kining kaagi sa Lite Shipping nga nagmugnag mga bag-ong ruta sa barko tali sa Sugbo labi na padulong sa Mindanao angayan gyud paluyohan.

Ug wa ko mahibulong nga usa sa aktibong nagpaluyo kaniya mao si Inday Sara. Pagkaswerte sa Visayas ug Mindanao kon si Inday mahimong sunod nga presidente. Mosugot unta ang iyang amahan.

POLPhil

Manglarga ngadto sa kaulohan ang pipila ka mga mahilig og politika aron manambong sa Political Officers League of the Philippines (POLPhil) alang sa usa ka nasudnong tigum karong Nov. 22-23.

Usa sa mga tuyo mao ang pangandam alang sa pagtukod og usa ka institute alang sa political officers ug mga ordinaryong mga tawo nga gusto makat-on sa pagpadagan og politikanhong kampanya.

Inisyatiba kini nga giduso ni Tuburan Vice Mayor Aljun Diamante sa miaging tuig pa aron mahatagan og gamayng teorya ug ethics ang pagpadagan og kampanya. Unsaon nga karon, murag nisamot man ang dirty tricks kay sa tinarong nga pamulitika.

Ato sang nahibaw-an nga dunay mga ingon niining mga political institutes didto sa Estados Unidos kay usa nako ka kaila nisalmot man sa usa ka training sa Democratic Party sa miaging tuig isip preparasyon sa kampanya alang sa pagka presidente nga nagsugod na karon didto.

Ang nasudnong tsirman sa POLPhil mao man si Diamante ug ang iyang co-chairman mao si Gen. Danny Lim, ang hepe karong sa Metro Manila Development Authority (MMDA) ug kanhi heneral. Nailado kini si Gen. Lim tungod kay usa man kini sa mga sundawo nga nag-rebelde tungod sa iyang prinsipyo.

Tuyo sa national conference nga mapalig-on ang han-ay sa political officers sa nasud ug kini maayo nga preparasyon alang sa umaabot nga mga political battles. (@anol_cebu sa Twitter))