PAGSUGOD sa iyang termino, nisaad si Mayor Edgar Labella nga humanon ang Cebu City Medical Center (CCMC) sulod sa 100 ka adlaw. Tutokan sab ang lain-laing mga suliran sa Syudad sa Sugbo sama sab aha ug basura.

Makita man nang CCMC nga wala gyud mahuman. Nagamit na unta alang sa pagbatok sa Covid-19. Dayon, karon lang bag-o nga niawas ang atong kasapaan ug nahimong sama sa sapa ang atong kadalanan.

Matod pa sa mayor, tungod kining grabing pagbaha sa basura. Hmmm.

Karong naklaro nato nga wala matuman ni Mayor Labella ang iyang saad, panahon na gyud nga iya kining tutokan sa tinuod. Dili lang pang-propaganda.

Ang ato lang nabalak-an mao ang kahimtang sa mga pamilya nga nagpuyo daplin sa kasapaan. Siguroon gyud sa administrasyon ang ilang relocation site. Ipakita ni Mayor Labella nga makamao gyud siya. Di lang pulos pagarpar.

Matod pa ni Gob. Gwen Garcia, buhat ang pasultihon.

Hilom

Ang problema lang anang buhat ang pasultihon kay lisod bawi-on sa sulti ang sayop nga nabuhat. Mao tingale nga hilom kaayo karon ang kampo sa mga Garcia kabahin sa pagkapili ni Speaker Lord Allan Velasco.

Sa miaging mga semana man gud, atong nasabtan sa body language nilang Kong. PJ Garcia ug Kong. Duke Frasco nga naa sila dapig kang kanhi speaker Alan Peter Cayetano.

Unsaon nga apil man sila sa mga gipangtudlo ni Cayetano niadtong tungora nga siya pa ang haring gangis diha sa Kongreso.

Bisan pa man, alang kanako, sakto lang nga mohilom una ang mga Garcia ug mangita og paagi nga makabawi. Total, diha man sila dapig kang Davao City Mayor Inday Sara Duterte-Carpio sa piliay sa 2019.

Importante kini aron makadawat og dugang pang mga proyekto ang lalawigan sa Sugbo gikan sa Ubos Balay Balauranan kun Lower House.

DepEd

Makaayo kaayo kining plano sa Department of Education (DepEd) nga kuhaan ang mga buluhaton sa atong kabataan nga ubos karon sa distance learning.

Gawas sa mga sipyat sa mga modules, grabi kaayo ang presyor karon sa mga kabataan tungod sa kadaghan sa mga buluhaton. Di sayon kining anha magtuon sa balay. Gawas nga bata lang ang nagtungha nga layo sa mga classmate, naa pa gyud kining daghang mga buluhaton sa balay.

Presyor sab kini sa mga ginikanan nga motabang sa ilang kabataan gawas sa pagpangita og kaayohan aron makakaon matag adlaw. Samot na sa mga ginikanan nga kulang sab sa edukasyon.

(@anol_cebu sa Twitter)