PILA ka semana nalang ang paabuton mobalik na sab ang klase alang sa mga publiko ug pribadong eskwelahan. Dalia ra panahon. Bag-o ra man tang nag-graduation ceremony.

Subay niini subob nga pagpangandam ang gihimo karon sa taga DepEd og local school board, pag-andam sa mga classroom ug ubang pasilidad. Kamo nga nakabisita sa mga publikong eskwelahan sa nakalabayng piniliay, naka kita siguro sa sitwasyon didto. May mga school building nga padayon pa nga gitrabaho. Ang uban finishing touches nalang ang gihimo aron magamit ang bag-ong building sa pagbukas sa klase.

Duna sab hinuoy mga eskwelahan nga wa pa makabaton og bag-ong building ilabi na didto sa probinsiya. Dunay daghang panginahanglan nga angayan hatagan og pagtagad.

Ang listahan sa mga panginahanglan posibling naduso na sa provincial DepEd apan nagkinahanglan pa og aksiyon. Budget maoy nag-unang hinungdan nganong wa pa masugdi ang mga proyekto.

Sa di pa mobukas ang klase siguradong ma-headline ang karaang balita og di na gani angay nga tawgong balita kong moingon na ang taga DepEd nga liboan na sab ka classroom ang gikinahanglan sa nagsugwak nga mga tinun-an. Liboan ka lingkoranan ang gikinahanglan og uban pang panginahanglan. Wa pa ni labot sa computers og libro. Unya ang pansayan kalimtan diay ni nga mao man ni ang nag-unang problema sa halos tanang eskwelahan. Naa ra unta ang pansayan ang problema lang kay way tubig nga magamit.

Ang gihimo sa ubang eskwelahan ang mga bata maoy ilang padad-on og tubig. Kapait. Kanus-a pa man mahaw-as gikan sa problema da tubig ang ubang mga eskwelahan. Unta himuon kini nga prayoridad sa mga bag-ong napili nga mga opisyales sa lungsod ug siyudad. Ang barangay ug taga eskwelahan unta di mosurender sa maugmad ang gidamgo nga water system.

Pananglit sa usa sa mga public high school sa Carcar City, usa ka bag-ong water system ang ipaila ila didto pinaagi sa pag gamit og solar power pagpaandar sa bomba. Di pa sab available ang maong kahimanan mao nataudtauran ang paglihok sa maong proyekto. Kining solar power nga makapaandar og water pump haum kaayo sa mga tinubdan sa tubig nga way koryente. Daghan kaayo ning maong tinubdan diha sa kabukiran diin nagbarug ang atong mga eskwelahan.

Gipahibawo ko sa akong tinubdan nga sa di madugay matapos na ang mild El Niño ug mopuli ang subsob nga mga pag-ulan. Gumikan niini, nitumaw na sab ang kabalaka alang niadtong mga tinun-an nga molabang og mga suba padung sa ilang mga eskwelahan. Nag-una niini ang mga eskwelahan sama sa Lusaran Elementary ug National High School. Daghan sa mga tinun-an didto ang molabang sa Lusaran River sa di pa moabot sa eskwelahan. DPWH dugay naman ning problema, wa bay nanuntok sa inyong pultahan aron kini masulbad?