GIBUKSAN niadtong Disyembre 1 ang laing hugna sa Night Market sa dalan Colon sa dakbayan sa Sugbo. Pahaum kini ning panahon nga atong gisaulog ang Pasko.

Wa ko magtuo nga usa ka yanong sugyot mahimong usa ka institusyon pagtabang sa gagmayng negosyante nga makaladlad sa ilang paninda. Mga tulo ka bulan sa wala pa ang Pasko niadtong tuig 2007, nagkita mi sa akong classmate sa college nga si George Chu sa dalan Colon.

Busy kaayo nga nangandam sa usa ka proyekto nga gitawag og Colon Revitalization project nga gisangun kaniya sa City Hall. Kauban niya ang pipila ka mga sinaligan nga nag gikan sa Vice Mayor’s Office. Ang bise mayor kaniadto mao si Vice Mayor Michael Rama.

Ang maong proyekto mao ang pagpanindot sa dalan Colon uban sa mga stake holders. Akong giingnan si George asay maayo kon sirhan ang usa ka bahin sa dalan Colon matag gabii ug dasigon ang mga manindahay pagladlad sa ilang mga baligya.

Ang iyang tubag lisod kay makaapekto sa dagan sa trapiko ilabi na kay panahon sa Pasko. Niinsister ko pinaagi sa pag-ingon nga ang Night Market dako og matabang sa mga gagmayng negosyante nga di maka abot pag-abang og stalls sa maong dapit.

Pila ka adlaw iya kong gipailaila sa mga tawo gikan sa city hall ug subling gituki ang maong sugyot. Ang isyu sa trapik mao gihapon ang nahimong babag sa maong plano.

Wa nako damha nanawag si George og nagpahibalo nga may go signal na ang maong sugyot. Tuod man pagka Disyembre 1 sa hapon sa maong tuig ang akong live report sa TV Patrol Central Visayas nanukad ba sa dalan Colon aron ipasibaw ang pagbukas sa labing una nga night market sa kasaysayan sa ciudad.

Gidumog sa daghang tawo ang maong dapit matag gabii. Dunay niadto aron mamamalit, mangaon ug mangusyoso. Pila ka adlaw ang nakalabay nanawag si George tungod sa reklamo sa ubang manindahay nga medyo napuhalan sila sa night market.

Gitumbok mao ang mga nag-abang og stalls sa Osmeña Boulevard. Apan wa kini maka apekto sa dagan sa Night Market. Tinuod daghang mga isyu ang nihabol sa night market apan wa kini makapaluya sa mga tawo nga nagtrabaho didto mahatagan lang og kahigayonan ang mga gagmayng manindahay nga makaambit sa grasya sa Pasko.

Alang karong paskoha ang gitinguha sa kagamhanan mao ang paghatag og higayon sa mga apektadong manindahay sa clearing operation nga makabawi bawi sa dakong alkansi nga ilang nasinati. Para nako di ni paigo. Pero mas bentaha nalang nga dunay gipasiugdahan. Gani atong gidasig ang mga dagkong negusyante nga mosuroy sa dapit basin makaduso pa sila og mga paagi unsaon nga ang ilang mga produkto maapil og baligya pinaagi sa mga manindahay. Akong pasabot mas dakong bentaha nga ang mga manindahay sa night market makakuha og dugang stocks nga wa na magkinahanglan og pohunan.

Mao ni ang gitawag nga angkat system, unyag kahalin na ang bayad. Sa akong naobserbahan sa nakalabay nga mga gabii, maayo naman dagan apan kuwang pa ang mga baligyaunon.