ANG lalaki kinsa mipahid og pintal sinagulan sa iyang laway sa nawong sa ubang tawo nga misaksi sa Sinulog grand parade mipatin-aw na ug nagbasol sa iyang gihimo. Nag-viral ang iyang binoang ug nailhan iyang dagway nga maoy nakapapugos kaniya sa pagpatim-aw. Daghan usab ang naghulga kaniya. Usahay makatabang baya ning video nga makuha pinaagi sa cellular phone. Kon wala pa to siya makuhai og video, wala unta mapagya ang iyang binastos.

Napugos pagpatim-aw si Jayson John Tapales, taga Dakbayan sa Danao, human mikatap ang iyang video sa social media. Sa video, nakita si Tapales nga miluwa og laway sa iyang kamot nga adunay sagol nga pintal. Iya kining gipamahid sa nawong sa mga miagi sa lugar nga diin siya naka-posisyon sa kanhi Baseline Restaurant sa Juana Osmena street.

Nalingaw kaayo siya sa iyang gihimo uban sa iyang nga barkada. Ambot kon aduna bay mireklamo sa iyang gipamahiran. Wala man pod silay kalibutan nga adunay sagol nga laway ang iyang gipamahid. Nahulog nga kontrabida si Tapales sa iyang gihimo. Grabeng saway nga nadawat gikan sa mga netizens. Gitawag na siya og ‘Boy Laway’. Hangtod nga nailhan ang iyang dagway sa taga Danao ug gi-imbitar siya sa mga opisyal sa dakbayan.

Niadtong Miyerkules napugos pagpatim-aw si Tapales ngadto sa buhatan ni Cebu City Councilor Joel Garganera kinuyugan sa opisyal sa Danao City. Sa iyang pag-atubang sa mga sakop sa media, aw, mi-angkon siya nga siya ang lalaking naa sa video. Mangayo siyag pasaylo sa iyang gihimo kay nadala lang kuno siya sa emosyon atol sa selebrasyon. Mora na siyag manok gidungoy. Mao man gyud na ang kasagaran nga himoon sa tawo nga nahilo og atraso.

Uwahi na ang pagbasol kay nakabiktima na siya. Ambot kon mopasaka pa og kaso ang mga tawo nga nabiktima nga nakita usab sa video. Unsa man kaso kahang ipasaka? Illegal discharge of saliva? (he,he). O unjust vexation? Daghan ang misugyot nga manduan si Tapales nga mag-public apology ug pahimuon og community service o ideklarar nga ‘persona non grata’ sa dakbayan sa Sugbo aron dili na maka-anhi. Aw, maayo na para motagam gyud. Mirisi. (bobbygnalzaro@gmail.com)