TAYMING gyud kaayo kay ang usa ka espisyal nga adlaw karong adlawa, Valentine’s Day, natumong usab sa Dominggo diin ang kadaghanan nag-relax gumikan kay walay trabaho. Bonding o hugoy-hugoy sa pamilya ug ingon man sa managhinigugmaay. Kay adlaw karon sa kasingkasing.

Nasayod ba mo nga ang unang Valentines Day gisaulog niadtong tuig 496. Nagsugod kini isip karaan nga Roman tradition. Ang mga Romano adunay festival nga gitawag og Lupercalia matag tungang bahin sa Pebrero. Ug kasagaran sa mga ningsalmot sa maong kalihukan mga batan-on nga manag-uyab.

Ang laing bersiyon sa pagsaulog sa Valentine’s Day mao nga niadtong panahon ni Emperador Claudius sa Roma, adunay usa ka pari nga si Fr. Valentine nga iyang gipapatay atol sa Pebrero 14 niadtong 3rd century AD. Ang bayanihong nahimo sa maong pari maoy naghatag kaniya og pasidungog. Gani nahimo gyud siyang santos nga mao si St. Valentine.

Sa iyang panahon, gidili ni Emperor Claudius ang pagpahigayon og kasal sa mga nagkahinigugmaay gumikan kay makadaut kini sa iyang nga sundawo. Dili na moadto ang iyang mga sundawo sa panggubatan gumikan kay mawili naman sila sa ilang mga asawa. Apan si Fr. Valentine sekreto nga mihimo og pagkasal sa mga sundawo ug sa ilang mga hinigugma.

Sa dihang nahibaw-an kini ni Emperador Claudius, iyang gipadakop ug gipapriso si Fr. Valentine ug gipapatay gyud. Sa dihang diha pa sa prisohan si Fr. Valentine, aduna siyay tinaguang pagtan-aw sa anak nga babaye sa iyang jailer. Ug sa dihang miabot na ang adlaw nga patyon na siya, atol sa Pebrero 14, nagbilin siya og suwat alang sa maong babaye. Iyang gibutang sa maong suwat nga ‘from your Valentine.’

Ug isip pag-ila sa pagkabayanihon ni Fr. Valentine, mao nga gipahinungod niya kining maong adlaw. Mao nga mo-greet ta sa atong mga mahal sa kinabuhi labi pa sa mga kauyaban nga Happy Valentine’s Day. (bobbygnalzaro@gmail.com)