MISMO si Visayas Chief Implementer retired Gen. Melquiades Feliciano ang mibutyag nga gi-estudyuhan karon sa kadagkuan sa Interagency Task Force for the Management of Emerging Infectious Diseases (IATF) nga patas-an ang quarantine status sa Cebu City nga sa kasamtangang gibutang ubos sa modified general community quarantine (MGCQ). Kini nunot sa nagsaka sa mga kaso sa nagpositibo sa coronavirus disease (Covid-19). Highest pointer na karon ang Cebu City kon itandi sa ubang dagkong mga siyudad sa nasud. Posibleng ibalik kita sa general community quarantine (GCQ) nga medyo estrikto.

Kon mahitabo kini, walay makapugong kay ang IATF man ang modesisyon kabahin niini depende usab sa approval ni Presidente Rodrigo Duterte. Walay mahimo ang atong lokal nga mga opisyal kon mao kini ang desisyon sa IATF gumikan kay aduna usab silay igong basihanan ug sukaranan. Daan na bitaw kitang nagpahimangno sa katawhan nga dili angay mokompiyansa kay ang pagsaka sa mga kaso magdepende ra usab kanato.

Matod ni kanhi US President Ronald Reagan: “The greatest leader is not necessarily the one who does the greatest things. He is the one that gets the people to do the greatest things.” Sa ato karong pagpakig gubat sa Covid-19, kitang katawhan nagtutok og nag-agad sa atong mga lider. Ilabi na gayud sa Presidente. Siya ang nanudlo sa mga sakop sa IATF nga maoy kinatas-ang grupo nga atong agdon kon unsaon pagpakig-away sa Covid-19.

Karon, lain-laing organisasyon migrado sa ilang diskarte nga hagbong o wala makapasar. Gani adunay nisugyot nga papason o bungkagon na lang ang IATF kay kuwestiyonable ang ilang pamaagi. Apan kadiyot lang. Duna bay lahi nga resulta kon ilisan nato ang naglangkob sa IATF?

Makapaabot ba kita og kausaban sa diskarte sa gobiyerno karon nga nakabuhi na man silag pulong nga kining atong pamaagi mao ang labing husto? Aduna na bay rekord ang gobiyerno nga miangkon nga labihan nilang palpaka? Ambot bitaw nganong dili sila maminaw sa mga pulong sa malampusong mga tawo sama ni Bill Gates nga niingon: “It’s fine to celebrate success but it is more important to heed the lessons of failure.” (bobbygnalzaro@gmail.com)