BISAN kon nagsugod na ang klase sa pampublikong mga tunghaan pinaagi sa modular o blended teaching, nangita gihapon og pamaagi ang kagamhanan aron mahatag og saktong suporta ang kabataan. Nakita nga dakong problema ang modular teaching sa mga magtutudlo gumikan sa hatud-kuha sa modules nga ipang-apod-apod ngadto sa mga tinun-an labi pa ngadto sa kabukiran.

Samtang ang ubang mga public school, kansang mga estudyante maka-afford sa mga gadget sama sa laptop ug computers, nag-online classes. Apan ang problema, ang signal usab sa internet. Ang uban motungtong god intawon sa mga atop ug mosaka sa punuan sa kahoy aron lang makakuha og signal.

Hinungdan nga adunay plano karon ang kagamhanan nga ang mga internet cafe o internitan himuon na lang nga classrooms kay kusog ang signal. Ambot pagkahanggaw niining maong sugyot. Naglikay man gani ta nga dili pa-eskuwelahon ang mga bata aron malikay sa Covid-19, ato na hinuon nga paadtuon sa mga internet cafe aron adto mag-klase? Nakita naman ninyo kon unsa ang situwasyon diha sulod sa internitan. Huot ang lugar.

Adunay nag- ingon nga duha ra ang katarungan nganong mangabot ang mga problema sa kalibutan. Ug kini mao nga ang tawo man god milihok sa bisan unsang butang sa walay paghuna-huna. Ug ang ikaduha, mohuna-huna bisan unsa sa walay paglihok. Kining pag-abot sa Covid-19 nakamugna og mga problema nga wa kanatoy nakapanghunahuna ug makapangandam.

Hinungdan nga naligsan niini tanang aspeto sa atong pagpakabuhi. Apan kinahanglang atubangon nato sa walay kukahadlok ang mga hulga ug risgo sama pananglit sa unsay labing luwas ug labing maayo sa atong kabataan aron sila makaangkon og kinaadman. Kay ang pagdumili pagpangitag paagi pagsulbad sa suliran sa edukasyon sa kabataan karon maoy pag-isa na sa atong mga kamot ug igo na lang mopiyong sa atong mga mata ug ipamahala ang ilang kaugmaon.

(bobbygnalzaro@gmail.com)