ADUNAY mga grupo sa mga hanite sa pinulungang Bisaya sama sa Lubas sa Dagang Bisaya (Ludabi) ug Puting Dagang Foundation Inc., nga maoy naningkamot nga magpabiling ma-preserbar (ambot mao ba ni ang Binisaya sa ‘to preserve) ang atong lumad ug lunsay’ng pinulungang Bisaya.

Kadtong mga pinulungan sa atong mga katiguwangan nga wala pa masaguli sa laing pinulungan sama sa Espanyol ug Tagalog ug sa ubang mga lingguwahe sa laing tribu nato dinhi sa nasud. Kining atong gipanggamit karon nga pinulungan aduna nay sagol sa Espanyol, Tagalog ug English. Sama anang gamit sa panimalay kutsara, tinidor, aparador, lamesa. Dili man na lunsay’ng Bisaya gyud. Ang Bisaya nga Cebuano lahi man pod gani sa Binisaya didto sa Mindanao ug ubang mga lugar dinhi sa Kabisay-an.

Mi-evolve o milambo usab ang mga pinulungan. Kon atong i-preserbar o gamiton ang mga karaang pinulungan, dili naman hinoon ta masabtan sa karon nga henerasyon. Labi pa mi dinhi sa media nga kinahanglan ang mga pulong nga among gamiton kanang dali kaayo nga masabtan sa kadaghanan.

Nakahupot kog kalendaryo nga hinimo sa taga Ludabi. Nahibalo mog unsay ilang tawag sa mga buwan o adlaw? Nia ay.

January - Ulalong; February - Daghangkahoy; March - Daghangbulan; April - Kiling: May - Himabuyan; June-Kabay; July - Hidapdapon; August-Lubad-lubad; September - Kangurolsol; October - Bagyo-Bagyo; November - Panglot nga diyutay; December-Panglot nga dako.

Samtang sa adlaw: Sunday-Ligid-ligid: Monday - Tingburukad; Tuesday - Dumason; Wednesday - Dukot-dukot; Thursday - Baylu-baylo; Friday - Danghos; Sabado - Hingut-hungot.

Nakasabot mo? Ako wala pod. (bobbygnalzaro@gmail.com)