Sukad sa paglingkod ni Presidente Rodrigo Duterte, iya nang gihingusgan ang kampaniya batok sa kurapsiyon sa nagkalain-laing ahensiya sa kagamhanan. Apan sama sa iyang kusganon nga kampaniya batok sa illegal nga drugas, pakyas siya. Nagkadaghan naman hinuong mga ahensiya sa kagamhanan nga nahilambigit sa kurapsiyon.

Bisan kon gisubli-subli kini niya sa pagpahimangno, apan daw gibali-wala lang sa ubang mga opisyal sa kagamhanan. Aduna tuod siyay gipangtaktak, apan diha ra kutob. Karon, wala gani siya makahingalan sa mga sakop sa Kongreso nga nahilambigit sa mga anomaliya. Dili siya moimbestigar kay ang Kongreso, co-equal branch sa executive department nga iyang gipangulohan.

Ang bantugang Insik nga military strategist nga si Sun Tzu misuwat ning mosunod: “If you know the enemy and know yourself, you need not fear the result of a hundred battles.”

Hubad sa Binisaya: “Kon nakaila ka sa imong kaaway ug nakaila ka sa imong kaugalingon, dili ka magbaton og kalisang sa bisan asang panggubatan.”

Ang atong kagamhanan tinuod ba gyud nga nakaila kon kinsay atong kaaway sa gubat batok sa kurapsiyon? Kay sukad pa kaniadto ug hangtod karon, wala pa gyud malunggui sa liog ang dagway sa kurapsiyon sa Pilipinas. Ngano kaha? Wa kaha maghinobra ang lanog nga pagtagawtaw sa gobiyerno apil na ang pagpaka-uwaw sa tanan nga gidudahan nga mga kawatan sa kagamhanan? Ug nga diha ra gyud kita kutob? Ang pagpanggulat, pagpakauwaw ug pagpanaghap nga maigo nato ang atong target sa kampanya batok sa kurapsiyon?Wala ba sila mahisama sa usa ka sabaan nga iro nga naglabi ang pagpamaghot ug way paak-paak? Morag tigre nga maayo lang mongaab apan walay paak kay pangag diay.

Morag di ra ba maayo ang timailhan sa sobrang pagpamaghot. Kay dunay giingon sa mga maalam nga: “The weaker you are, the louder you bark.” Hinaot nga dili ingon niini ang gipakita karon sa atong pamunuan ning naghinapos nga bahin sa iyang termino. (bobbygnalzaro@gmail.com)