ADUNAY mga balaodnon karon sa Kongreso, sa Ubos Balay Balauranan ug Senado, kabahin sa mail in voting. Susama ra kini sa absentee voting alang sa mga Overseas Filipino Workers (OFW), mga maestra, pulis ug militar ingon man sa mga sakop sa media nga dili makabutar panahon sa eleksiyon gumikan sa ilang trabaho. Advance voting ba.

Dugay na kining gisagop sa Estados Unidos ug ubang kanasuran. Gisugyot kini karon sa atong mga magbabalaod gumikan sa Covid 19 nga dili na magpunsisok ang mga tawo sa presento panahon sa eleksiyon. Unya pa sa 2022 ang eleksiyon apan gipangandaman na kining daan kay sa maong tuig dili pa kompleto nga mawala ang Covid 19. Apan gisupak ang maong balaodnon kay posibleng mahitabo ang pagpanikas. Sama aning gireklamo ni Pres. Donald Trump sa bag-o lang nahuman nga eleksiyon sa Amerika.

Pero asa man ka mangita og eleksiyon dinhi sa Pilipinas nga walay tikas? Bisan nag-automated na ta, naa man gihapon ang tikas. Sa gobiyerno sa Pilipinas sayod kita nga nihit kaayo kanang gitawag og kredibilidad o pagkatuhuan sa atong mga pulitiko.

Sakit kini nga paminawon sa hingtundan nga mga pulitiko apan mao kana ang tinuod. Sa dugay na nga panahon nga kitang mga Pinoy nahimong way kapilian o walay choice, gawas sa pag am-am sa atong kaugalingon nga ang atong mga opisyal nga nakadaog matag eleksiyon mao ang ‘best choice sa katawhan ug mao ang labing haum nga moserbisyo kanato bisan nasayod gyud kita sa mga hokus- pukos nila aron lang makadaog sa piniliay.

Ug mao kini hinungdan nga morag ingub kaayong paminawon ang mga pulitiko nga mamasangil nga matisakan sila kon tumanon ang usa ka paagi sa botasyon sama sa ‘mail in voting’. Mora bag mga angheles sila sa langit nga mikunsad sa yuta ug nga wala gyud makailad ug makahimog binoang matag eleksiyon.

Mahadlok silang matikasan o nahadlok lang silang malabwan sa laing tikasan?

Wala kaha ni sila maigo aning giingon nga: ‘Kining mga bentahoso maoy labing nahadlok nga mabentahaan.’ (bobbygnalzaro@gmail.com)